ചൂടിൽ വെന്തുരുകി കേരളം; 12 ജില്ലകളിൽ യെല്ലോ അലർട്ട്

തിരുവനന്തപുരം : സംസ്ഥാനത്ത് ഇന്നും കനത്ത ചൂട് തുടരും. താപനില 4 ഡി​ഗ്രി വരെ ഉയർന്നേക്കും. ഇന്ന് ഇടുക്കി, വയനാട് ജില്ലകളൊഴികെ 12 ജില്ലകളിലും യെല്ലോ അലർട് പ്രഖ്യാപിച്ചിട്ടുണ്ട്. കേരളത്തിൽ പാലക്കാടും പുനലൂരിലുമാണ് ഉയർന്ന താപനില തുടരുന്നത്. ശരാശരി താപനിലയിൽ നിന്ന് അഞ്ച് ഡി​ഗ്രി കൂടുതലുള്ള പുനലൂരിൽ ഇന്ന് ഉച്ചയോടെ 38 ഡി​ഗ്രി വരെ താപനിലയെത്തും.

ഇന്ന് പാലക്കാട് 40 ഡി​ഗ്രിയും കൊല്ലത്ത് 39 ഡി​ഗ്രിയും പത്തനംതിട്ട, തൃശൂർ, കോഴിക്കോട്, കാസർകോട് ജില്ലകളിൽ 38 ഡി​ഗ്രിയും താപനിലയെത്തും. തൃശൂരിൽ കനത്ത ചൂടിനിടെ ഇന്ന് പൂരം അരങ്ങേറുകയാണ്. കേന്ദ്ര കാലാവസ്ഥാവകുപ്പ് ഉഷ്‌ണതരംഗ സാധ്യതാ മഞ്ഞ അലേർട്ട് പ്രഖ്യാപിച്ചിട്ടുള്ള സാഹചര്യത്തിൽ പൂരത്തിൽ പങ്കെടുക്കുന്ന പൊതുജനങ്ങൾ ജാഗ്രത പാലിക്കേണ്ടത് അത്യാവശ്യമാണെന്ന് തൃശൂർ ജില്ലാ കളക്ടർ മുന്നറിയിപ്പ് നൽകിയിട്ടുണ്ട്.

വേനലിന് ആശ്വാസമായി തിങ്കളാഴ്ച മുതൽ മഴയെത്തുമെന്ന് കാലാവസ്ഥാ വകുപ്പ് അറിയിച്ചിട്ടുണ്ട്. നേരത്തെ ബുധനാഴ്ച മുതൽ മഴയെന്ന് കാലാവസ്ഥ വകുപ്പ് പ്രവചിച്ചിരുന്നു. അതിനാൽ ബുധനാഴ്ച ഏപ്രിൽ 29 മുതൽ പത്തനംതിട്ട, ഇടുക്കി, കണ്ണൂർ. കാസ‌ർകോട് ജില്ലകളിൽ കനത്ത മഴയുണ്ടായേക്കാം അതിനാൽ യെല്ലോ അലർട് പ്രഖ്യാപിച്ചിട്ടുണ്ട്.