പ്ലസ് വൺ ഫലം 2026: വെബ്സൈറ്റ് തകരാറിൽ; വിദ്യാർഥികൾ ആശങ്കയിൽ

തിരുവനന്തപുരം: കേരള പ്ലസ് വൺ പരീക്ഷാഫലം ഉടൻ പ്രസിദ്ധീകരിക്കുമെന്ന റിപ്പോർട്ടുകൾക്കിടയിൽ ഔദ്യോഗിക വെബ്സൈറ്റായ dhsekerala.gov.in പ്രവർത്തിക്കാത്തത് വിദ്യാർഥികളിൽ ആശങ്ക.

ഫലം ഇന്ന് വരുന്നു എന്ന തരത്തിൽ വ്യാപക പ്രചാരണം നടക്കുന്നുണ്ടെങ്കിലും, അധികൃതർ ഇതുവരെ ഔദ്യോഗികമായി തീയതി പ്രഖ്യാപിച്ചിട്ടില്ല. 2026 മാർച്ച് 5 മുതൽ 27 വരെയാണ് പ്ലസ് വൺ പരീക്ഷകൾ നടന്നത്.

ഫലം പ്രസിദ്ധീകരിച്ചുകഴിഞ്ഞാൽ വിദ്യാർഥികൾക്ക് results.hse.kerala.gov.in, dhsekerala.gov.in, keralaresults.nic.in എന്നീ ഔദ്യോഗിക വെബ്സൈറ്റുകൾ വഴി മാർക്ക് ലിസ്റ്റ് പരിശോധിക്കാം. വെബ്സൈറ്റുകൾ തടസ്സപ്പെട്ടാൽ, എസ്എംഎസ് വഴിയും ഫലം അറിയാം.

ഇതിനായി KERALA11 {Registration Number} എന്ന് ടൈപ്പ് ചെയ്ത് 56263 എന്ന നമ്പറിലേക്ക് അയക്കുക. വിദ്യാർഥിയുടെ പേര്, രക്ഷിതാക്കളുടെ പേര്, റോൾ നമ്പർ, വിഷയങ്ങളിലെ മാർക്ക്, മൊത്തം മാർക്ക്, വിജയിച്ചോ എന്ന വിവരങ്ങൾ എന്നിവ മാർക്ക് ലിസ്റ്റിൽ ഉണ്ടായിരിക്കും. കഴിഞ്ഞ വർഷങ്ങളിൽ മെയ് അവസാനമോ ജൂൺ തുടക്കത്തിലോ ആണ് ഫലം പുറത്തുവന്നത്.

തിരക്ക് കാരണം വെബ്സൈറ്റ് തകരാറിലായ സാഹചര്യത്തിൽ, വിദ്യാർഥികൾ പരിഭ്രാന്തരാകാതെ ബോർഡിന്റെ ഔദ്യോഗിക സ്ഥിരീകരണം വരെ കാത്തിരിക്കാൻ നിർദ്ദേശിക്കുന്നു. അതേസമയം ഫലപ്രഖ്യാപനം മാറ്റിവച്ചു എന്ന തരത്തിലും പ്രചാരണങ്ങൾ നടക്കുന്നുണ്ട്. ഔദ്യോഗിക പ്രതികരണങ്ങളൊന്നും വന്നിട്ടില്ല.