വെന്തുരുകി കേരളം; ഇന്ന് മുതൽ വേനൽ മഴയ്ക്ക് സാധ്യത

തിരുവനന്തപുരം : സംസ്ഥാനത്ത് കൊടും ചൂട് ഇന്നും തുടരും. ഇടുക്കിയും വയനാടും ഒഴികെയുള്ള 12 ജില്ലകളിൽ ഇന്ന് ഉയർന്ന താപനില മുന്നറിയിപ്പ്. ഈ ജില്ലകളിൽ യെല്ലോ അലർട് പ്രഖ്യാപിച്ചു. ഈ 12 ജില്ലകളിലും താപനില ഇന്ന് 3-4 ഡി​ഗ്രിവരെ താപനില ഉയർന്നേക്കാം.

പാലക്കാട് ഇന്നും താപനില 40 ഡിഗ്രി കടന്നേക്കും. സൂര്യാതപ അപകടങ്ങളും വർധിക്കുകയാണ്. പാലക്കാട്‌ ജില്ലയിൽ ഇന്നലെ മാത്രം 40.1 ഡിഗ്രി താപനിലയാണ് രേഖപ്പെടുത്തിയത്. കൊല്ലം ജില്ലയിൽ 39 ഡി​ഗ്രിയും, പത്തനംതിട്ട കോട്ടയം ജില്ലകളിൽ 38 ​ഡി​ഗ്രി വരെയും താപനില രേഖപ്പെടുത്തിയേക്കാം എന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.

താപനില ഉയരുന്നതിനാൽ പൊതുജനങ്ങൾ കേന്ദ്ര കാലാവസ്ഥാ വകുപ്പിന്റെയും ആരോ​ഗ്യ വകുപ്പിന്റെയും ദുരന്തനിവാരണ അതോറിറ്റിയുടേയും ജാ​ഗ്രതാ നിർദേശങ്ങൾ ​ഗൗരവത്തിലെടുക്കണമെന്നും മുന്നറിയിപ്പുണ്ട്.

സംസ്ഥാനത്ത് ഇന്ന് മുതൽ വെള്ളിയാഴ്ച വരെ വേനൽമഴ ലഭിച്ചേക്കാം എന്നും കേന്ദ്ര കാലാവസ്ഥാ വകുപ്പിന്റെ മുന്നറിയിപ്പുണ്ട്. ഇതുമായി ബന്ധപ്പെട്ട് ബുധനാഴ്ച മുതൽ വെള്ളിയാഴ്ച വരെ ചില സംസ്ഥാനങ്ങളിൽ യെല്ലോ അലർട് പ്രഖ്യാപിച്ചിട്ടുണ്ട്. ഇന്ന് സംസ്ഥാനത്തിന്റെ വിവിധ ഭാ​ഗങ്ങളിൽ ഇടിമിന്നലോട് കൂടിയ മഴക്ക് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു.

ബുധനാഴ്ച ഇടുക്കി - പത്തനംതിട്ട ജില്ലകളിലും, വ്യാഴാഴ്ച കണ്ണൂർ - കാസർകോട് ജില്ലകളിലും കാലാവസ്ഥാ വകുപ്പ് മഴ മുൻകരുതലിന്റെ ഭാ​ഗമായി യെല്ലോ അല‌ർട് പ്രഖ്യാപിച്ചിട്ടുണ്ട്.

കേരളത്തിലെ പ്രധാന ന​ഗരങ്ങളിലെ ഇന്നത്തെ ഉയർന്ന താപനില

പാലക്കാട് - 36°

പത്തനംതിട്ട - 36°

മലപ്പുറം - 35°

കോട്ടയം - 34°

ആലപ്പുഴ - 34°

കൊല്ലം - 34°

തിരുവനന്തപുരം - 33.7°

കണ്ണൂർ - 33°

കാസർകോട് - 33°

തൃശൂർ - 32.9°

കോഴിക്കോട് - 31.6°

കൊച്ചി - 30.9°

ഇടുക്കി - 31°

വയനാട് - 31°