ട്രീസ ജോളിക്ക് സർക്കാർ ജോലി; ചരക്കുസേവന നികുതി വകുപ്പിൽ നിയമനം

തിരുവനന്തപുരം: കോമൺവെൽത്ത് ഗെയിംസിൽ ഇരട്ടമെഡൽ നേടി ട്രീസ ജോളിക്ക്‌ സർക്കാർ ജോലി നൽകും. സംസ്ഥാന ചരക്കുസേവന നികുതി വകുപ്പിൽ സൂപ്പർന്യൂമററി തസ്തിക സൃഷ്ടിച്ച് ജോലി നൽകാൻ മന്ത്രിസഭാ യോ​ഗം തീരുമാനിച്ചു. ബാഡ്മിന്റൺ വനിതാ ഡബിൾസിൽ വെങ്കലവും മിക്സഡ് ടീം ഇനത്തിൽ വെള്ളിയുമാണ് താരം നേടിയത്. കോമൺവെൽത്ത് ഗെയിംസിൽ രണ്ട് മെഡൽ നേടുന്ന ആദ്യ മലയാളി താരമാണ് ട്രീസ.

ബ്രണ്ണൻ കോളേജിലെ വിദ്യാർത്ഥിനിയായിരിക്കെയാണ് താരം ഈ നേട്ടങ്ങൾ സ്വന്തമാക്കിയത്. കണ്ണൂരിലെ മലയോരഗ്രാമപ്രദേശമായ ചെറുപുഴ സ്വദേശിയായ ട്രീസ, പിതാവ് ജോളി മാത്യുവിന്റെ കീഴിലാണ് ആദ്യകാല പരിശീലനം നടത്തിയത്. ട്രീസയുടെ മികവ് തിരിച്ചറിഞ്ഞ് കേരള ബാഡ്മിന്റൺ അസോസിയേഷൻ ഒരു മാസത്തെ വിദഗ്ധ പരിശീലനത്തിന് ഇന്തോനേഷ്യയിലേക്ക് അയച്ചിരുന്നു. അണ്ടർ- 15ൽ സബ് ജൂനിയർ ഏഷ്യൻ ഗെയിംസിലും റഷ്യയിൽ നടന്ന ജൂനിയർ വേൾഡ് ചാമ്പ്യൻഷിപ്പിലും ഇന്ത്യയെ പ്രതിനിധീകരിച്ചു. ബംഗ്ലാദേശിൽ നടന്ന ഇന്റർനാഷണൽ ടൂർണമെന്റിൽ സിംഗിൾസിലും ഡബിൾസിലും ചാമ്പ്യനായി. ദുബായിൽ നടന്ന ഇന്റർനാഷണൽ ടൂർണമെന്റിൽ മൂന്നാം സ്ഥാനം നേടി.

2021-ൽ ഡെൻമാർക്കിൽ നടന്ന തോമസ് ആൻഡ് ഹ്യൂബർ കപ്പിൽ ഇന്ത്യൻ സീനിയർ ടീമിനെ പ്രതിനിധീകരിച്ച് ക്വാർട്ടർ ഫൈനലിലെത്തി. പോളണ്ടിലെ ഇന്റർനാഷണൽ ചലഞ്ച് ടൂർണമെന്റിൽ റണ്ണറപ്പായി. ഇന്ത്യയിൽ നടന്ന ഇൻഫോസിസ് ഇന്റർനാഷണൽ ടൂർണമെന്റിൽ ചാമ്പ്യനായി.