ഒന്നാം റാങ്കടക്കം മാറി, കേരള സിലബസുകാർ കീം ലിസ്റ്റിൽ പിന്നിൽ

കോഴിക്കോട്‌: എല്ലാ വിദ്യാർഥികൾക്കും തുല്യരീതിയിൽ മാർക്ക് എന്ന സദുദ്ദേശ്യത്തോടെ പുതുക്കിയ മാർക്ക്‌ ഏകീകരണ രീതി ഉപേക്ഷിക്കാൻ സർക്കാർ നിർബന്ധിതരായപ്പോൾ പിന്നിലായത്‌ കേരള സിലബസുകാർ. കേരള സിലബസ്‌ പഠിച്ച 47,175 വിദ്യാർഥികളാണ്‌ കീം പ്രവേശന പരീക്ഷയെഴുതിയത്‌. ഇതിൽ 21 പേർ മാത്രമാണ്‌ പുനഃക്രമീകരിച്ച പട്ടികയിൽ ആദ്യ നൂറിൽ ഉൾപ്പെട്ടത്‌. മുമ്പത്തെ പട്ടികയിൽ 43 പേർ ഇടംപിടിച്ചിരുന്നു. ആദ്യ 5000ൽ 1796 പേർ മാത്രമാണ്‌ ഇപ്പോൾ ഇടം നേടിയത്‌. മുമ്പ്‌ ഇത്‌ 2,539 പേരായിരുന്നു.

പുനഃക്രമീകരിച്ച പട്ടികയിൽ ആദ്യ നൂറിൽ 79 സിബിഎസ്‌ഇ വിദ്യാർഥികൾ ഇടംപിടിച്ചു. മുമ്പ്‌ 55 പേരായിരുന്നു. ആദ്യ 5000ൽ 2960 സിബിഎസ്‌ഇ, 201 ഐഎസ്‌സിഇ വിദ്യാർഥികളും ഉൾപ്പെടുന്നു. മറ്റ്‌ സിലബസുകൾ പഠിച്ച 43 കുട്ടികളുമുണ്ട്‌. ആദ്യ 100 റാങ്കുകാരിൽ 77 ആൺകുട്ടികളും 23 പെൺകുട്ടികളുമാണുള്ളത്‌.

ആദ്യ 1000 പേരിൽ ഏറ്റവുമധികം കുട്ടികൾ എറണാകുളത്താണ്‌ – 175. തിരുവനന്തപുരം – 111, കൊല്ലം – 62, പത്തനംതിട്ട – 26, ആലപ്പുഴ – 40, കോട്ടയം – 73, ഇടുക്കി – 12, തൃശൂർ – 114, പാലക്കാട്‌ – 40, മലപ്പുറം – 90, കോഴിക്കോട്‌ – 96, വയനാട്‌– 14, കണ്ണൂർ–- 58, കാസർകോട്‌ – 27 എന്നിങ്ങനെയാണ്‌ മറ്റ്‌ ജില്ലകളിൽനിന്നുള്ളവർ. കേരളത്തിന്‌ പുറത്തുനിന്നുള്ള 62 പേരും പട്ടികയിലുണ്ട്‌.

കീം പുതിയ റാങ്ക്‌ പട്ടിക പ്രസിദ്ധീകരിച്ചു

തിരുവനന്തപുരം/ കൊച്ചി: ഹൈക്കോടതി വിധിയുടെ അടിസ്ഥാനത്തിൽ പഴയ സമവാക്യപ്രകാരം കേരള എൻജിനിയറിങ്‌, ആർക്കിടെക്ചർ ആൻഡ് മെഡിക്കൽ എൻട്രൻസ് (കീം) പരീക്ഷയുടെ പുതിയ റാങ്ക്‌ പട്ടിക പ്രസിദ്ധീകരിച്ചു. എൻജിനിയറിങ്ങിൽ 76,230 പേർ യോഗ്യത നേടി. പട്ടികയിൽ 67,505 പേർ ഉൾപ്പെട്ടിട്ടുണ്ട്‌.

ഒന്നാം റാങ്കടക്കം മാറി. എൻജിനീയറിങ്‌ വിഭാഗത്തിൽ കവടിയാർ സ്വദേശി ജോഷ്വ ജേക്കബ്‌ തോമസ്‌ ഒന്നാം റാങ്ക്‌ നേടി. മുമ്പ്‌ പ്രസിദ്ധീകരിച്ച റാങ്ക്‌ ലിസ്റ്റിൽ ജോഷ്വ അഞ്ചാമത്‌ ആയിരുന്നു. ഹരികിഷൻ ബൈജു (എറണാകുളം) രണ്ടാം റാങ്ക്‌ സ്വന്തമാക്കി. എമിൽ ഐപ്പ്‌ സക്കറിയ (തിരുവനന്തപുരം), ആദിൽ സയാൻ (മലപ്പുറം), അദ്വൈത് അയിനാപ്പിള്ളി സന്ദീപ്‌ (കർണാടക), അനന്യ രാജീവ്‌ (കർണാടക), ജോൺ ഷിനോജ്‌ (എറണാകുളം), ബി എൻ അക്ഷയ്‌ ബിജു (കോഴിക്കോട്‌), അച്യുത്‌ വിനോദ്‌ (കോഴിക്കോട്‌), അൻമോൾ ബൈജു (കോഴിക്കോട്‌) എന്നിവരാണ്‌ മൂന്നു മുതൽ പത്തുവരെ റാങ്ക്‌ നേടിയത്‌. ഏഴാം സ്ഥാനത്തുള്ള ജോൺ ഷിനോജിന് ആദ്യ പട്ടികയിൽ ഒന്നാം റാങ്കായിരുന്നു.

പെൺകുട്ടികളിൽ അനന്യ രാജീവ്‌, ബി ആർ ദിയ രൂപ്യ എന്നിവർ ആദ്യ രണ്ടുസ്ഥാനക്കാരായി. എസ്‌സി വിഭാഗത്തിൽ ഹൃദിൻ എസ്‌ ബിജു, ബി അനന്തകൃഷ്‌ണൻ എന്നിവരും എസ്‌ടി വിഭാഗത്തിൽ കെ എസ്‌ ശബരീനാഥ്‌, ആർ പി ഗൗരിശങ്കർ എന്നിവരും ആദ്യ രണ്ട്‌ സ്ഥാനത്തെത്തി. പ്ലസ്‌ ടു മാർക്ക്‌ പരിഗണിക്കില്ലാത്തതിനാൽ കീം ഫാർമസി റാങ്ക് ലിസ്റ്റിൽ മാറ്റമില്ല.