print edition കരിപ്പൂർ വിമാനത്താവളവും പരിസര പ്രദേശങ്ങളും റെഡ് സോൺ

മലപ്പുറം: മലേഷ്യൻ പ്രധാനമന്ത്രി അൻവർ ഇബ്രാഹിമിന്റെ സന്ദർശനത്തോടനുബന്ധിച്ച് സുരക്ഷാക്രമീകരണങ്ങളുടെ ഭാഗമായി കരിപ്പൂർ രാജ്യാന്തര വിമാനത്താവളവും പരിസര പ്രദേശങ്ങളും താൽക്കാലികമായി റെഡ് സോണായി പ്രഖ്യാപിച്ച് കലക്ടര്‍ ഡോ. വിനയ് ഗോയൽ ഉത്തരവിട്ടു. ഞായർ, തിങ്കൾ ദിവസങ്ങളിലാണ്‌ ജില്ലയിൽ സന്ദർശനം.

കരിപ്പൂർ വിമാനത്താവളത്തിന് പുറമെ കൊണ്ടോട്ടി നഗരസഭ, വിവിഐപി യാത്ര ചെയ്യുന്ന പാതയോരത്തെ പഞ്ചായത്തുകൾ, താമസിക്കുന്ന കാക്കഞ്ചേരി തുല ക്ലിനിക്കൽ വെൽനെസ് സാങ്ച്വറിയും അതിന്റെ മൂന്ന് കിലോമീറ്റർ ചുറ്റളവും ഉൾപ്പെടുന്ന പ്രദേശങ്ങളുമാണ് റെഡ് സോണിലുള്ളത്.

പ്രദേശങ്ങളിൽ ഡ്രോണുകൾ, പാരാഗ്ലൈഡറുകൾ, ബലൂണുകൾ, പട്ടങ്ങൾ, ആകാശത്തേക്ക് ഉയരുന്ന പടക്കങ്ങൾ, പ്രകാശം വമിക്കുന്ന വസ്തുക്കൾ, ലേസർ ബീമുകൾ എന്നിവയുടെ ഉപയോഗം കർശനമായി നിരോധിച്ചു. വിമാനങ്ങളുടെയോ വിവിഐപിയുടെയോ സഞ്ചാരത്തിന് തടസ്സമാകുന്ന രീതിയിലുള്ള ഇത്തരം നിയമവിരുദ്ധ പ്രവർത്തനങ്ങൾ ശ്രദ്ധയിൽപ്പെട്ടാൽ പൊതുജനങ്ങൾ ഉടൻ തന്നെ അടുത്തുള്ള പൊലീസ് സ്റ്റേഷനിൽ അറിയിക്കണമെന്ന് ഉത്തരവിൽ വ്യക്തമാക്കുന്നു.