കാനത്തിൽ ജമീലയുടെ സംസ്‌കാരം ചൊവ്വാഴ്ച; മൂന്നിടങ്ങളിൽ പൊതുദർശനം

കൊയിലാണ്ടി: കൊയിലാണ്ടി എംഎൽഎയും സിപിഐ എം കോഴിക്കോട് ജില്ലാ കമ്മിറ്റിയംഗവുമായ കാനത്തിൽ ജമീലയുടെ (60) ഖബറടക്കം ചൊവ്വ വൈകിട്ട്‌ ആറിന്‌ അത്തോളി കുനിയിൽ ജുമാ മസ്‌ജിദ്‌ ഖബർസ്ഥാനിൽ നടക്കും. ചൊവ്വ രാവിലെ വരെ മെയ്‌ത്ര ആശുപത്രിയിൽ സൂക്ഷിക്കുന്ന മൃതദേഹം അവിടെനിന്ന്‌ നേതാക്കൾ ഏറ്റുവാങ്ങും. തുടർന്ന്‌ സിപിഐ എം കോഴിക്കോട്‌ ജില്ലാ കമ്മിറ്റി ഓഫീസായ സി എച്ച്‌ കണാരൻ സ്‌മാരക മന്ദിരത്തിൽ പൊതുദർശനം. അതിനുശേഷം കൊയിലാണ്ടി ട‍ൗൺ ഹാളിലും ഉച്ചക്കുശേഷം തലക്കുളത്തൂരിലും പൊതുദർശനമുണ്ടാകും. തുടർന്ന്‌ തലക്കുളത്തൂരിലെ വീട്ടിലേക്ക്‌ കൊണ്ടുപോകും.

ശനി രാത്രി 8.40ന്‌ കോഴിക്കോട്ടെ സ്വകാര്യ ആശുപത്രിയിലായിരുന്നു അന്ത്യം. ജനാധിപത്യ മഹിളാ അസോസിയേഷൻ സംസ്ഥാന വൈസ് പ്രസിഡന്റാണ്‌. അർബുദ ബാധിതയായി വീട്ടിൽ വിശ്രമത്തിൽ കഴിയുകയായിരുന്ന ജമീലയെ ശനിയാഴ്‌ചയാണ്‌ ആശുപത്രിയിൽ പ്രവേശിപ്പിച്ചത്‌. തീവ്രപരിചരണ വിഭാഗത്തിൽ ചികിത്സയിലായിരുന്ന അവർ ഒന്പതുമാസത്തോളമായി ചെന്നൈയിലും കോഴിക്കോട്ടെ സ്വകാര്യ ആശുപത്രികളിലും ചികിത്സയിലായിരുന്നു.

തലക്കുളത്തൂർ പഞ്ചായത്ത്‌ പ്രസിഡന്റ്‌, ചേളന്നൂർ ബ്ലോക്ക്‌ പഞ്ചായത്ത്‌ പ്രസിഡന്റ്‌, ജില്ലാ പഞ്ചായത്ത്‌ പ്രസിഡന്റ്‌ എന്നീ നിലകളിൽ പ്രവർത്തിച്ച ജമീല 2021–ലാണ്‌ കൊയിലാണ്ടിയില്‍നിന്ന്‌ എംഎൽഎയായത്‌. എല്‍ഐസി ഏജന്റായി പ്രവര്‍ത്തിക്കുന്നതിനിടെയാണ്‌ പൊതുജനാധിപത്യ പ്രസ്ഥാനത്തിലേക്ക്‌ എത്തുന്നത്‌. 1995-ല്‍ തലക്കുളത്തൂര്‍ പഞ്ചായത്ത് പ്രസിഡന്റായി തെരഞ്ഞെടുക്കപ്പെട്ടു. രണ്ടായിരത്തില്‍ തലക്കുളത്തൂര്‍ പഞ്ചായത്ത് സ്ഥിരംസമിതി അധ്യക്ഷയും 2005-ല്‍ ചേളന്നൂര്‍ ബ്ലോക്ക് പഞ്ചായത്ത് പ്രസിഡന്റുമായി. 2010-ലും 2020-ലും കോഴിക്കോട്‌ ജില്ലാ പഞ്ചായത്ത് പ്രസിഡന്റായി. നിയമസഭയിലേക്ക് തെരഞ്ഞെടുക്കപ്പെട്ടതോടെ ജില്ലാ പഞ്ചായത്ത് പ്രസിഡന്റ്‌ സ്ഥാനം രാജിവച്ചു. ചികിത്സയിൽ കഴിയുമ്പോഴും മണ്ഡലത്തിലെ വികസന പ്രവർത്തനങ്ങളിൽ സജീവമായി ഇടപെട്ടു.

കുറ്റ്യാടി നടുവിലക്കണ്ടി വീട്ടിൽ പരേതരായ ടി കെ ആലിയുടെയും മറിയത്തിന്റെയും മകളാണ്. ഭർത്താവ്: കെ അബ്ദുറഹ്മാൻ. മക്കൾ: ഐറിജ് റഹ്മാൻ (യുഎസ്എ), അനൂജ സുഹൈബ് (ന്യൂനപക്ഷ കോർപറേഷൻ ഓഫീസ്, കോഴിക്കോട്). മരുമക്കൾ: സുഹൈബ്, തേജു. സഹോദരങ്ങൾ: ജമാൽ, നസീർ, റാബിയ, കരീം (ഗൾഫ്), പരേതയായ ആസ്യ.