ജോസഫ് ​ഗ്രൂപ്പിന്റേത് പരുന്തിന്റെ പുറത്തിരിക്കുന്ന കുരുവിയുടെ അവസ്ഥ; കേരള കോൺ​ഗ്രസിനെ കണ്ട് ആരും വെള്ളംകോരാൻ വരേണ്ട: ജോസ് കെ മാണി

തിരുവനന്തപുരം: ഇടതുപക്ഷത്തിനൊപ്പം കേരള കോൺ​ഗ്രസ് (എം) അടിയുറച്ചുനിൽക്കുമെന്ന് ചെയർമാൻ ജോസ് കെ മാണി പറഞ്ഞു. തദ്ദേശ തെരഞ്ഞെടുപ്പിൽ പാലായിൽ ഉൾപ്പെടെ തിരിച്ചടിയെന്ന് വിലയിരുത്താനാകില്ല. പാലാ മുനിസിപ്പാലിറ്റിയിൽ കഴിഞ്ഞകൊല്ലം 10 സീറ്റുകൾ കേരള കോൺ​ഗ്രസ് (എം) വിജയിച്ചത്. ഇത്തവണയും അത്രയും സീറ്റുകളിൽ വിജയിച്ചു. പാലാ നിയമസഭാ മണ്ഡലത്തിൽ 2198 വോട്ടിന്റെ ലീഡ് എൽഡിഎഫിനുണ്ട്. ജോസഫ് ​ഗ്രൂപ്പ് വീമ്പടിക്കുന്ന തൊടുപുഴയിൽ മുനിസിപ്പാലിറ്റിയിൽ വിജയിച്ചത് രണ്ട് സീറ്റിൽ മാത്രമാണെന്നും ജോസ് കെ മാണി മാധ്യമങ്ങളോട് പറഞ്ഞു.

1980ൽ തൊടുപുഴ മുനിസിപ്പാലിറ്റി രൂപീകൃതമായശേഷം ഒരിക്കൽപോലും ജോസഫ് ​ഗ്രൂപ്പ് ചെയർമാനായി വന്നിട്ടില്ല. പക്ഷേ കേരള കോൺ​ഗ്രസ് (എം) മൂന്ന് തവണ ചെയർമാൻ സ്ഥാനം വഹിച്ചു. രണ്ടില കരിഞ്ഞുപോയി എന്നൊക്കെയുള്ളത് ചിലരുടെ വ്യാമോഹം മാത്രമാണ്. പരുന്തിന്റെ പുറത്തിരിക്കുന്ന കുരുവിയുടെ അവസ്ഥയാണ് ജോസഫ് ​ഗ്രൂപ്പിന്. കേരള കോൺ​ഗ്രസിനെ കണ്ട് ആരും വെള്ളംകോരാൻ വരേണ്ടതില്ല. തദ്ദേശ തെരഞ്ഞെടുപ്പിൽ സംഘടനാപരമായി കേരള കോൺ​ഗ്രസിന് ലഭിക്കേണ്ട വോട്ടുകൾ ലഭിച്ചിട്ടുണ്ട്. പാലാ നിയമസഭാ മണ്ഡലത്തിൽ നാല് ജില്ലാ പഞ്ചായത്ത് ഡിവിഷനുകളാണുള്ളത്. ഇതിൽ മൂന്നിലും കഴിഞ്ഞതവണയും ഇത്തവണയും എൽഡിഎഫ് വിജയിച്ചു. തെരഞ്ഞെടുപ്പിലുണ്ടായ വീഴ്ചകൾ പരിശോധിച്ച് ആവശ്യമായ തിരുത്തലുകൾ സ്വീകരിക്കുമെന്നും ജോസ് കെ മാണി പറഞ്ഞു.