ജിതിന്‍ ഷാജി കൊലപാതകം: നാട്ടിലെ സമാധാന അന്തരീക്ഷം തകർക്കാനുള്ള ആർഎസ്‌എസ്‌ നീക്കം- ഡിവൈഎഫ്ഐ

തിരുവനന്തപുരം: ഡിവൈഎഫ്‌ഐ പ്രവർത്തകൻ മാമ്പാറ പട്ടാളത്തറയിൽ ജിതിൻ ഷാജിയെ ആർഎസ്‌എസ്‌- ബിജെപി പ്രവർത്തകർ വെട്ടി കൊലപ്പെടുത്തിയ സംഭവത്തിൽ ഡിവൈഎഫ്ഐ സംസ്ഥാന സെക്രട്ടറിയേറ്റ്‌ ശക്തമായി പ്രതിഷേധിച്ചു. നാട്ടിലെ സമാധാന അന്തരീക്ഷം തകർക്കാനുള്ള ആർഎസ്‌എസ്‌ നീക്കത്തിന്റെ ഭാഗമാണ്‌ കൊലപാതകം. നാടിന്റെ സ്വൈര്യ ജീവിതം തകർക്കാൻ വിവിധ തലങ്ങളിൽ ഗൂഢാലോചന നടക്കുന്നുണ്ട്‌.

സംഘർഷമുണ്ടാക്കാനല്ല പ്രശ്‌നങ്ങൾ പറഞ്ഞു തീർക്കാനാണ്‌ ജിതിൻ അവിടെയെത്തിയതെന്ന്‌ ഇതിനകം വ്യക്തമായി. ആയുധങ്ങളുമായി അവിടെയെത്തിയ ആർഎസ്‌എസ്‌ - ബിജെപി പ്രവർത്തകർ ആസൂത്രികമായി നടത്തിയ കൊലപാതകമാണിത്‌. ജിതിന്റെ വയറിനും, തുടയിലും അടക്കം ആഴത്തിലുള്ള മുറിവുകളുണ്ട്‌. വിരൽ അറ്റുപോയി. ജിതിനെ വെട്ടിയ ജിഷ്‌ണുവും മറ്റ് കൊലയാളി സംഘങ്ങളും സജീവ ആർഎസ്എസ് - ബിജെപി പ്രവർത്തകരാണ്‌. ആർഎസ്എസ് - ബിജെപി കൊലയാളി സംഘത്തിനെതിരെ മുഴുവൻ ജനാധിപത്യ വിശ്വാസികളും അണിനിരക്കണമെന്ന് ഡിവൈഎഫ്ഐ സംസ്ഥാന സെക്രട്ടറിയേറ്റ്‌ പ്രസ്താവനയിലൂടെ അഭ്യർത്ഥിച്ചു.