ജല്‍ ജീവന്‍ മിഷന്‍ പദ്ധതി: നബാര്‍ഡില്‍ നിന്ന് സാമ്പത്തിക സഹായം സ്വീകരിക്കാം

തിരുവനന്തപുരം: സംസ്ഥാനത്തെ ജല്‍ ജീവന്‍ മിഷന്‍ പദ്ധതികള്‍ക്കായി നബാര്‍ഡില്‍ നിന്നും സാമ്പത്തിക സഹായം സ്വീകരിക്കാന്‍ വാട്ടര്‍ അതോറിറ്റിക്ക് ചൊവ്വാഴ്ച ചേർന്ന മന്ത്രിസഭായോ​ഗം അനുമതി നല്‍കി. 8862.95 കോടി രൂപയുടെ വായ്പാ അനുമതി തത്വത്തിൽ നൽകുകയും ആദ്യ ഘട്ടത്തിൽ 5000 കോടി രൂപ എടുക്കാൻ അനുവദിക്കുകയും ചെയ്യും.

ജൂലൈ വരെയുള്ള കണക്ക് പ്രകാരം ഗ്രാമീണ വീടുകളിൽ കുടിവെള്ളമെത്തിക്കുന്ന ജൽ ജീവന്‌ മിഷന്‌ സംസ്ഥാന സർക്കാർ നാലുവർഷംകൊണ്ട്‌ നൽകിയത്‌ 6033 കോടി രൂപയാണ് നൽകിയത്. ഇതുവരെയുള്ള 11,643 കോടി രൂപയിൽ 5610 കോടിയാണ്‌ കേന്ദ്രം നൽകിയത്‌. കേന്ദ്ര– സംസ്ഥാന സർക്കാരുകൾ തുല്യചെലവ്‌ വഹിക്കുന്ന പദ്ധതിയിൽ നിലവിൽ കേന്ദ്രസർക്കാർ അനുവദിച്ചതിനേക്കാൾ 423 കോടി രൂപ സംസ്ഥാനം ചെലവിട്ടു.

2019ൽ ആരംഭിച്ച്‌ 2024ൽ അവസാനിക്കേണ്ടിയിരുന്ന പദ്ധതി 2028വരെ ദീർഘിപ്പിച്ചിട്ടുണ്ട്‌. 44714.79 കോടി രൂപയാണ് പദ്ധതിയുടെ ആകെ ചെലവ്. സംസ്ഥാനത്തെ ഗ്രാമീണ മേഖലയിലെ 70,77,273 വീടുകളിൽ കുടിവെള്ളമെത്തിക്കുന്നതാണ്‌ ജൽ ജീവൻ മിഷൻ.

ഭൂഗർഭ ജലത്തിന്റെ അമിത ചൂഷണം ഒഴിവാക്കിയാണ്‌ പദ്ധതി കേരളത്തിൽ നടപ്പാക്കുന്നത്‌. നദികൾ പോലെയുള്ള കുടിവെള്ള സ്രോതസ്സിനെ കേരളം ആശ്രയിക്കുമ്പോൾ, ഇതര സംസ്ഥാനങ്ങളിൽ കുഴൽക്കിണറുകളാണ്‌ കൂടുതൽ. മാർച്ചിലെ കണക്ക് പ്രകാരം 115 പഞ്ചായത്തും ഒമ്പത്‌ നിയമസഭാ മണ്ഡലങ്ങളും 100 ശതമാനം കുടിവെള്ളലഭ്യത കൈവരിച്ചു. സാമ്പത്തിക പ്രയാസത്തിനിടയിലും സംസ്ഥാനം പലപ്പോഴും ബജറ്റിൽ നീക്കിവച്ചതിലേറെ തുക നൽകി.

മന്ത്രിസഭായോഗ തീരുമാനങ്ങൾ

കേരള സംഘങ്ങൾ രജിസ്ട്രേഷൻ ബിൽ

തിരുവിതാംകൂർ- കൊച്ചി സാഹിത്യ ശാസ്ത്രീയ ധാർമിക സംഘങ്ങൾ (1955- ലെ 12 ആം ആക്ട്), മലബാർ പ്രദേശത്ത് ബാധകമായ 1860ലെ സംഘങ്ങൾ രജിസ്ട്രേഷൻ ആക്ട്, (1860 -ലെ 21-ാം കേന്ദ്ര ആക്ട്) എന്നീ നിയമങ്ങൾ റദ്ദ് ചെയ്ത് കേരളത്തിൽ രജിസ്റ്റർ ചെയ്യുന്ന സംഘങ്ങൾക്കായുള്ള 'കേരള സംഘങ്ങൾ രജിസ്ട്രേഷൻ ബിൽ- 2025'ന് അംഗീകാരം നൽകി.

ബിഡ് അനുവദിച്ചു

ഇടുക്കി ജില്ലയിലെ അറകുളം പഞ്ചായത്തിലും വെള്ളിയാമറ്റം പഞ്ചായത്തിലും പ്രവൃത്തി നടത്താൻ കേരള വാട്ടർ അതോറിറ്റി മാനേജിംഗ് ഡയറക്ടർ സമർപ്പിച്ച പദ്ധതിക്ക് 9,73,16,914.95 രൂപയുടെ ബിഡ് അനുവദിച്ചു. (WSS to Arakkulam and Veliyamattom (part) panchayath in Idukki district - Supply and Laying Clear Water Pumping Mains, Construction of GLSR at various zones, supplying, laying, testing and commissioning of Clear Water pump sets (Low - Level-Zono), Package VIII- General Civil work)