ഡോൾഫിനുകളുടെ ഇണചേരൽദൃശ്യം പകർത്തി ഗവേഷകർ

കൊച്ചി

ഹംപ് ബാക്ക് (കൂനൻ) ഡോൾഫിനുകളുടെ ഇണചേരൽ രാജ്യത്ത്​ ആദ്യമായി ഡ്രോൺ കാമറയിൽ പകർത്തി ഐസിഎആർ–സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് ടെക്നോളജി (സിഫ്​റ്റ്​)യിലെ ഗവേഷകർ. 2024–25ൽ കൊച്ചി  തീരക്കടലിൽ നടത്തിയ ഡ്രോൺ ഉപയോഗിച്ച്​ നടത്തിയ പര്യവേക്ഷണത്തിൽ നാല് ഡോൾഫിനുകൾ അടങ്ങുന്ന കൂട്ടത്തെ ഗവേഷണസംഘം കണ്ടെത്തി.

ഇണചേരലും അതിനുമുന്നോടിയായുള്ള സ്വഭാവസവിശേഷതകളും അടങ്ങുന്ന മൂന്നു മിനിറ്റ് വീഡിയോ പഠനത്തിന് വിധേയമാക്കി. 24 മുതൽ 29 സെക്കൻഡു​വരെ നീളുന്ന ഇണചേരലും അനുബന്ധ ചലനങ്ങളും പരിശോധിച്ച്​​ വിശകലനം ചെയ്തു. സാധാരണയായി ഒന്നോ അതിലധികം ചാക്രിക രീതിയിലുള്ള പ്രത്യേക നീന്തൽ നടത്തിയാണ്  ഹംപ് ബാക്ക് ഡോൾഫിനുകൾ ഇണചേരുന്നത്. അത്തരത്തിലുള്ള ഒരു പൂർണചക്രം ഗവേഷകർക്ക്​ കാമറയിൽ പകർത്താനായി.

ഹംപ് ബാക്ക് ഡോൾഫിനുകൾ ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചർ റെഡ് ലിസ്റ്റിൽ വംശനാശഭീഷണി നേരിടുന്നവയാണ്​.

ഇ‍ൗ ഡോൾഫിനുകളുടെ സാമൂഹിക പ്രജനന പെരുമാറ്റ സ്വഭാവത്തെപ്പറ്റി വരുംകാല പഠനത്തിന് നിർണായക പങ്കുവഹിക്കുമെന്ന് സിഫ്റ്റ് ഡയറക്ടർ ഡോ. ജോർജ്​ നൈനാൻ പറഞ്ഞു. ഡ്രോൺവഴിയുള്ള പഠനത്തിൽ, കടൽ സസ്തനികളുടെ സ്വാഭാവിക പെരുമാറ്റത്തെ ബാധിക്കാതെ സ്വാഭാവിക ആവാസ വ്യവസ്ഥയിൽനിന്നുള്ള കൃത്യമായ വിവരങ്ങൾ ശേഖരിക്കാനാകുമെന്നും അദ്ദേഹം വ്യക്തമാക്കി.

സീനിയർ സയന്റിസ്റ്റ്​​ ഡോ. കെ കെ പ്രജിത്തിന്റെ നേതൃത്വത്തിലുള്ള ഗവേഷണസംഘത്തിൽ ഡോ. പരസ് നാഥ് ജാ, ഡോ. റിതിൻ ജോസഫ്, ഡോ. ദിജു ദാസ്, ഋഷികേശ്,  ഇമ്മാനുവൽ, അബു താഹിർ ഷാ എന്നിവരും ഉണ്ടായിരുന്നു.