print edition പ്രായമായവർക്ക‍് 
സുരക്ഷയൊരുക്കും ; 24 മണിക്കൂറും പ്രവർത്തിക്കുന്ന ഹെൽപ്‌ലൈൻ ഒരുക്കും : മുഖ്യമന്ത്രി

കണ്ണൂർ

പ്രായമായവർക്ക് വീടുകളിൽ സുരക്ഷ ഒരുക്കുമെന്ന് മുഖ്യമന്ത്രി പിണറായി വിജയൻ. വയോജനങ്ങൾക്ക്‌ ആവശ്യമായ ഘട്ടങ്ങളിൽ സഹായം ഉറപ്പാക്കാൻ 24 മണിക്കൂറും പ്രവർത്തിക്കുന്ന ഹെൽപ്‌ലൈൻ സംവിധാനമൊരുക്കും.

ഇതിനായി തദ്ദേശ സ്ഥാപനം, പൊലീസ്‌, റസിഡൻസ്‌ അസോസിയേഷൻ തുടങ്ങിയവ സംയോജിപ്പിച്ചുള്ള സുരക്ഷാ സംവിധാനമൊരുക്കും. കണ്ണൂരിൽ വിഷൻ 2031ന്റെ ഭാഗമായുള്ള ആഭ്യന്തര വകുപ്പ്‌ സെമിനാറിൽ സംസാരിക്കുകയായിരുന്നു അദ്ദേഹം.

ഉയർന്ന വയോജന ജനസംഖ്യയാണ്‌ കേരളത്തിൽ. 2031 ആകുന്പോഴേക്കും 50 ലക്ഷത്തോളം വയോജനങ്ങൾ ഉണ്ടാകുമെന്നാണ്‌ കണക്ക്‌. 40 ലക്ഷത്തോളം വീടുകളിൽ ഇവർക്ക് തുണയുണ്ടാകില്ല. ഇവർക്ക്‌ ആരോഗ്യപ്രശ്‌നങ്ങളോ മറ്റെന്തെങ്കിലും അപായസൂചനകളോ ലഭിച്ചാൽ ഒരേസമയം പൊലീസിനെയും ബന്ധുക്കളെയും ബന്ധപ്പെടാനാകണം. ഇതിനായുള്ള ഡിജിറ്റൽ കണക്‌ടിവിറ്റി പ്രാവർത്തികമാക്കും. ആവശ്യങ്ങൾ നേരിട്ടറിയിക്കുന്നതിനോ വിവരം ലഭിക്കുന്നവർക്ക്‌ അക്കാര്യങ്ങൾ കൈമാറുന്നതിനോ കൺട്രോൾ റൂം ഒരുക്കും. ഒറ്റയ്‌ക്ക്‌ താമസിക്കുന്ന വയോജനങ്ങളുടെ വീടും പരിസരവും സിസിടിവി കാമറകളുടെ നിരീക്ഷണത്തിലാക്കും.

സിറ്റിസൺ പൊലീസിങ് ശക്തിപ്പെടുത്താൻ നിലവിലുള്ള ആപ്‌ വിപുലപ്പെടുത്തി ഇന്ററാക്‌ടീവ്‌ എമർജൻസി റെസ്‌പോൺസ്‌ പ്ലാറ്റ്‌ഫോമായി ഉയർത്തും. ഇത്‌ ഫലപ്രദമാകുന്പോൾ പൊലീസ്‌ സംസ്‌കാരം അപ്പപ്പോൾ പ്രതികരിക്കുന്നതും ഉത്തരവാദിത്വമുള്ളതുമായി മാറും. വിവരം നൽകുന്നതാരാണെന്നത്‌ രഹസ്യമായിരിക്കും.

സൂക്ഷ്‌മവും സമഗ്രവുമായി എങ്ങനെ വീണ്ടും പൊലീസിനെ നവീകരിക്കാമെന്നാണ്‌ പരിശോധിക്കുന്നത്‌. പ‍ൗരകേന്ദ്രീകൃതമായ രക്ഷാകർതൃ സ്വഭാവത്തിലേക്ക്‌ മാറ്റിയെടുക്കാനുള്ള പ്രക്രിയയാണ്‌ നടക്കുന്നത്‌. ക്രമസമാധാന ഭദ്രത, സമഗ്ര സുരക്ഷ, ജനാധിപത്യമൂല്യ സംരക്ഷണം തുടങ്ങിയവ ഉത്തരവാദിത്വമായി ഏറ്റെടുക്കുന്ന സംവിധാനമായി പൊലീസ്‌ മാറിയിട്ടുണ്ടെന്നും മുഖ്യമന്ത്രി പറഞ്ഞു.