ഉഷ്ണ തരംഗം: മുഖ്യമന്ത്രിയുടെ നേതൃത്വത്തില്‍ ഉന്നതതലയോഗം

തിരുവനന്തപുരം : സംസ്ഥാനത്ത് ഉഷ്ണ തരംഗവുമായി ബന്ധപ്പെട്ട് നിലവിലുള്ള സാഹചര്യം വിലയിരുത്തുന്നതിനും ആവശ്യമായ നടപടികൾ കൈക്കൊള്ളുന്നതിനുമായി മുഖ്യമന്ത്രി പിണറായി വിജയൻ ഉന്നതതല യോഗം വിളിച്ചു. ശനിയാഴ്ച രാവിലെ 11 മണിക്കാണ് ഓൺലൈനായി യോഗം ചേരുക. മന്ത്രിമാരും ചീഫ് സെക്രട്ടറിയും ദുരന്തനിവാരണ അതോറിറ്റി ഉദ്യോഗസ്ഥരും യോ​ഗത്തിൽ പങ്കെടുക്കും.

ചൂട് ക്രമാതീതമായി വർധിച്ചതിനുപിന്നാലെ സംസ്ഥാനത്ത് ഉഷ്ണ തരം​ഗത്തിന് സാധ്യതയുണ്ടെന്ന് സംസ്ഥാന ​ദുരന്ത നിവാരണ അതോറിറ്റി വ്യക്തമാക്കിയിരുന്നു. ചൂട് വർധിക്കുന്നതിനൊപ്പം അൾട്രാവയലറ്റ് വികിരണത്തോതും ഉയരുന്നത് ആശങ്കയുയർത്തുന്നുണ്ട്. പൊതുജനങ്ങൾക്കായി സുരക്ഷ മുൻകരുതലുകൾ പുറപ്പെടുവിച്ചിട്ടുണ്ട്. പകൽ 11 മുതൽ 3 വരെയുള്ള സമയങ്ങളിൽ ശരീരത്തിൽ നേരിട്ട് വെയിൽ കൊള്ളുന്നത് ഒഴിവാക്കണമെന്നും പുറത്തിറങ്ങുമ്പോൾ കുട, തൊപ്പി, സൺ​ഗ്ലാസ്, പാദരക്ഷകൾ എന്നിവ നിർബന്ധമായും ധരിക്കണമെന്നും നിർദേശത്തിൽ പറയുന്നു. ലോക്ഡൗണിനു സമാനമായ ജാ​ഗ്രത സ്വീകരിക്കണമെന്നും നിർദേശമുണ്ട്.

ചൂട് കൂടിയതോടെ പല ജില്ലകളിലും ഓറഞ്ച്, മഞ്ഞ അലർട്ടുകൾ പ്രഖ്യാപിച്ചിട്ടുണ്ട്. പലയിടങ്ങളിലും വേനൽ മഴ പെയ്യുന്നുണ്ടെങ്കിലും ചൂടിന് ശമനമുണ്ടാകുന്നില്ല. ചൂട് വർധിച്ചതോടെ സംസ്ഥാനത്തെ വെദ്യുതി ഉപഭോ​ഗവും റെക്കോർഡിലെത്തി.