'ഹാൽ' കാണാൻ ഹൈക്കോടതിയും; ആക്ഷേപങ്ങള്‍ ശരിയല്ലെങ്കിൽ പിഴ ചുമത്തും

കൊച്ചി: ഷെയ്ൻ നിഗം നായകനായ 'ഹാൽ' എന്ന സിനിമ ഹൈക്കോടതി ഡിവിഷൻ ബെഞ്ച് ബുധനാഴ്ച കാണും. സിനിമയ്‌ക്കെതിരെ കത്തോലിക് കോൺഗ്രസ് നൽകിയ അപ്പീലിൽ കൂടുതൽ വാദം കേൾക്കുന്നതിന് മുന്നോടിയായാണ് ജസ്റ്റിസുമാരായ സുശ്രുത് അരവിന്ദ് ധർമ്മാധികാരി, പി വി ബാലകൃഷ്ണൻ എന്നിവരുടെ ഡിവിഷൻ ബെഞ്ച് ചിത്രം കാണാൻ തീരുമാനിച്ചത്.

സിനിമയിൽ മതവികാരം വ്രണപ്പെടുത്തുന്നതോ ആക്ഷേപകരമായതോ ആയ ഉള്ളടക്കം ഇല്ലെന്ന് കോടതിക്ക് ബോധ്യപ്പെട്ടാൽ ഹർജിക്കാർക്കെതിരെ പിഴ ചുമത്തും എന്നും കോടതി കർശന മുന്നറിയിപ്പ് നൽകി. സിനിമയിലെ ഏതെല്ലാം ഭാഗങ്ങളിലാണ് എതിർപ്പുള്ളതെന്ന് കൃത്യമായ സമയക്രമം സഹിതം രേഖാമൂലം അറിയിക്കാനും കോടതി കത്തോലിക്ക കോൺഗ്രസിനോട് നിർദ്ദേശിച്ചു.

സിനിമയിലെ ചില രംഗങ്ങൾ മതവികാരം വ്രണപ്പെടുത്തുന്നതാണെന്നും, ലൗ ജിഹാദിനെ പ്രോത്സാഹിപ്പിക്കുന്നതാണെന്നുമാണ് കത്തോലിക്ക കോൺഗ്രസിന്റെ പ്രധാന വാദം. എന്നാൽ ഈ വാദങ്ങളടക്കം തള്ളിക്കൊണ്ടാണ് സിനിമയുടെ പ്രദർശനാനുമതി അപേക്ഷ വീണ്ടും പരിഗണിക്കാൻ സെൻസർ ബോർഡിന് സിംഗിൾ ബെഞ്ച് മുൻപ് നിർദ്ദേശം നൽകിയിരുന്നത്.

സിനിമയ്ക്ക് 'എ' സർട്ടിഫിക്കറ്റ് നൽകിയ സെൻസർ ബോർഡ് നടപടി മുൻപ് ഹൈക്കോടതി റദ്ദാക്കിയിരുന്നു. സെൻസർ ബോർഡിന് തങ്ങളുടെ ഇഷ്ടാനുസരണം അത്തരം അധികാരം പ്രയോഗിക്കാൻ കഴിയില്ലെന്നും കോടതി വ്യക്തമാക്കി. മതപരമായ നിയന്ത്രണങ്ങളെ മറികടക്കാൻ പ്രണയത്തിന് കഴിയുമെന്നാണ് സിനിമ പറയുന്ന പ്രമേയം. ഇത് ഭരണഘടനാപരമായ മൂല്യങ്ങളുമായി ചേർന്നുപോകുന്നതാണെന്നും, പരസ്പര വിശ്വാസങ്ങളെ സിനിമ തെറ്റായി ചിത്രീകരിക്കുന്നില്ലെന്നും കോടതി നിരീക്ഷിച്ചിരുന്നു.