ഗുരുവായൂരിൽ ഷീ സ്റ്റേ ഹോം 
പ്രവർത്തനം തുടങ്ങി

ഗുരുവായൂർ

ഗുരുവായൂരിലെത്തുന്ന വനിതകൾക്ക് സുരക്ഷിത താമസസൗകര്യമൊരുക്കാൻ സ്വാതന്ത്ര്യ സമര സേനാനി ക്യാപ്റ്റൻ ലക്ഷ്മിയുടെ പേരിൽ നിർമിച്ച ​ഗുരുവായൂർ ന​ഗരസഭയുടെ ഷീ സ്റ്റേ ഹോം പ്രവർത്തനം ആരംഭിച്ചു. മന്ത്രി എം ബി രാജേഷ് ഉദ്ഘാടനം ചെയ്തു. എൻ കെ അക്ബർ എംഎൽഎ അധ്യക്ഷനായി. ക്യാപ്റ്റൻ ലക്ഷ്മിയുടെ മകളും പൊതുപ്രവർത്തകയുമായ സുഭാഷിണി അലി വിശിഷ്ടാതിഥിയായി. മുരളി പെരുനെല്ലി എംഎൽഎ, ഗുരുവായൂർ ദേവസ്വം ചെയർമാൻ ഡോ. വി കെ വിജയൻ എന്നിവർ മുഖ്യാതിഥികളായി.

ഗുരുവായൂർ ഔട്ടർ റിങ്‌ റോഡിനോട് ചേർന്ന് നഗരസഭയുടെ ഏകദേശം15 സെന്റ്‌ സ്ഥലത്ത് നാല്‌ നിലകളിലായി 12500 ലധികം ചതുരശ്രയടി വിസ്തീർണത്തിലാണ് കെട്ടിടം നിർമിച്ചിട്ടുള്ളത്. ഗ്രൗണ്ട് ഫ്ലോറിൽ ഓഫീസ്റൂം, സ്വീകരണ കേന്ദ്രം, ഭക്ഷണശാല എന്നിവ പ്രവർത്തിക്കും.

ഒന്നും, രണ്ടും നിലകളിൽ ഏഴ്‌ റൂമുകളിലായി 70 ബെഡുകളുള്ള ഡോർമിറ്ററിയാണ് ഒരുക്കിയിട്ടുള്ളത്. മൂന്നാം നിലയിൽ 35 ബെഡുകളുള്ള ഏഴ്‌ മുറികളും സജ്ജമാക്കിയിട്ടുണ്ട്. ചടങ്ങിൽ നഗരസഭ ചെയർമാൻ എം കൃഷ്ണദാസ്, വൈസ് ചെയർപേഴ്‌സൺ അനീഷ്മ ഷനോജ്, സ്ഥിരം സമിതി അധ്യക്ഷരായ എ സായിനാഥൻ, ഷൈലജ സുധൻ, ബിന്ദു അജിത് കുമാർ, ന​ഗരസഭാ സെക്രട്ടറി എച്ച് അഭിലാഷ്‌ കുമാർ എന്നിവർ സംസാരിച്ചു.

സ്ത്രീകൾ ഏറ്റവും 
സുരക്ഷിതർ കേരളത്തിൽ: 
സുഭാഷിണി അലി

​സ്ത്രീകൾക്ക് ഏറ്റവും സുരക്ഷിതമായി ജീവിക്കാവുന്ന ഇന്ത്യയിലെ തന്നെ മികച്ച സംസ്ഥാനം കേരളമാണെന്ന്‌ സുഭാഷിണി അലി. ഗുരുവായൂർ ന​ഗരസഭ സ്വതന്ത്ര്യസമരസേനാനി ക്യപ്റ്റൻ ലക്ഷ്മിയുടെ പേരിൽ നിർമിച്ച ഷീ സ്റ്റേ ഹോം ഉദ്ഘാടനത്തിൽ വിശിഷ്ടാതിഥിയായി പങ്കെടുക്കാനാണ്‌ ക്യാപ്റ്റൻ ലക്ഷ്മിയുടെ മകൾകൂടിയായ സുഭാഷിണി അലി ​ഗുരുവായൂരിലെത്തിയത്. വനിതകൾക്ക് സംരക്ഷണമൊരുക്കുന്ന കേന്ദ്രത്തിന് തന്റെ അമ്മയുടെ പേരിട്ടതിൽ സന്തോഷമുണ്ടെന്നും അവർ പറഞ്ഞു.

യുപിയിലും മധ്യപ്രദേശിലുമെല്ലാം സ്ത്രീകൾക്ക് സുരക്ഷിതത്വമില്ലാത്ത അവസ്ഥയാണ്.

സ്ത്രീകൾക്കെതിരായ അതിക്രമങ്ങൾക്കെതിരെ പരാതി നൽകിയാൽ കേസെടുക്കാൻ പോലും ഈ സംസ്ഥാനങ്ങളിൽ തയ്യാറാകുന്നില്ല. തന്റെ അമ്മ പോലും ​തോക്കുമായാണ് സഞ്ചരിച്ചിരുന്നത്. ഗുരുവായൂർ ക്ഷേത്ര നഗരിയുടെ ശുചിത്വത്തെക്കുറിച്ച്‌ വാചാലയായ അവർ വാരണാസി മേയറെ ​ഗുരുവായൂരിലേക്ക് കൊണ്ടുവന്ന് ക്ഷേത്ര ന​ഗരി എങ്ങനെ വൃത്തിയുള്ളതായി സംരക്ഷിക്കണമെന്ന് കാണിക്കണമെന്നും പറഞ്ഞു. സുഭാഷിണി അലിക്കൊപ്പം സിപിഐ എം ജില്ലാ സെക്രട്ടറി കെ വി അബ്ദുൾഖാദറുമുണ്ടായിരുന്നു.