ഹരിതമിഷന്റെ പദ്ധതി വമ്പൻ ഹിറ്റ്; ആറ് മാസത്തിൽ 3,302 പച്ചത്തുരുത്തുകൾ

ആലപ്പുഴ : കേരളത്തിന്റെ പച്ചപ്പ്​ സംരക്ഷിക്കാൻ ഹരിത കേരളം മിഷൻ ആരംഭിച്ച ‘പച്ചത്തുരുത്ത്’ പദ്ധതി ആറ്​ വർഷവും രണ്ടുമാസവും പിന്നിടുമ്പോൾ സൃഷ്​ടിച്ചത്​ 3,302 പച്ചത്തുരുത്തുകൾ. 2019ലെ ലോക പരിസ്ഥിതിദിനത്തിൽ തിരുവനന്തപുരം പോത്തൻകോട് മണലകം കുടുംബാരോഗ്യ കേന്ദ്രത്തിൽ നീർമാതളത്തൈ നട്ട് മുഖ്യമന്ത്രി പിണറായി വിജയൻ ഉദ്​ഘാടനംചെയ്​ത പദ്ധതിയാണ്​ സംസ്ഥാനമൊട്ടാകെ 1141.71 ഏക്കറിൽ പച്ചപ്പുവിരിച്ചത്​. 832 തദ്ദേശ സ്ഥാപനങ്ങളിൽ പദ്ധതി​ നടപ്പാക്കി​​. 150- ഓളം തദ്ദേശ ഭരണ സ്ഥാപനങ്ങളിൽ പദ്ധതി സ്ഥാപിക്കുന്നതിനുള്ള ശ്രമങ്ങൾ​ പുരോഗമിക്കുന്നു​. ഒറ്റ പദ്ധതിയിൽ ഇത്രയേറെ തരിശുനിലങ്ങള്‍ പച്ചപ്പണിയുന്നത് രാജ്യത്ത്​ ആദ്യം​. 5000 പച്ചത്തുരുത്തുകൾ എന്ന ലക്ഷ്യത്തിലേക്ക്​ പദ്ധതി അടുത്തുകൊണ്ടിരിക്കുകയാണ്​.

കാസർകോട്​ ജില്ലയിലാണ്​ കൂടുതൽ പച്ചത്തുരുത്തുകൾ. 798 എണ്ണം. കൂടുതൽ വിസ്​ത‍ീർണം കണ്ണൂരിലും–328.84 ഏക്കർ. കണ്ണൂർ മുഴക്കുന്നം പഞ്ചായത്തിലാണ്​ 136 ഏക്കറിൽ ഏറ്റവുംവലിയ പച്ചത്തുരുത്ത്​. കാസർകോട്​, കണ്ണൂർ, ആലപ്പുഴ, കോട്ടയം ജില്ലകളിലായി 35.64 ഏക്കറിൽ 22 കണ്ടൽ പച്ചത്തുരുത്തുകളും ക്ഷേത്രങ്ങളും കാവുകളും കേന്ദ്രീകരിച്ച്​ സംരക്ഷിക്കപ്പെടുന്ന 129 ദേവഹരിതം പച്ചത്തുരുത്തുകളുമുണ്ട്​. എല്ലാ തദ്ദേശസ്ഥാപന പരിധിയിലും പച്ചത്തുരുത്തുകൾ സ്ഥാപിച്ച്​ തിരുവനന്തപുരം സമ്പൂര്‍ണ പച്ചത്തുരുത്ത് ജില്ലയായി.

പച്ചത്തുരുത്ത്​ എന്നാൽ...

തദ്ദേശസ്വയംഭരണ സ്ഥാപനങ്ങളുടെയോ സന്നദ്ധ സംഘടനകളുടെയോ പൊതുസ്ഥാപനങ്ങളുടെയോ വകുപ്പുകളുടെയോ വ്യക്തികളുടെയോ നേതൃത്വത്തില്‍ സ്ഥലം കണ്ടെത്തി തദ്ദേശീയ വൃക്ഷങ്ങളും സസ്യങ്ങളും ഉള്‍പ്പെടുത്തി സംരക്ഷിക്കുന്നതാണ്​ പച്ചത്തുരുത്ത്​. മനുഷ്യ നിര്‍മിതമായ ചെറുവനങ്ങളാണിവ. ഉപയോഗശൂന്യമായ അരസെന്റ് ഭൂമി മുതല്‍ പച്ചത്തുരുത്തുകളാക്കാം. ഫലവൃക്ഷങ്ങളും കുറ്റിച്ചെടികളും വള്ളിച്ചെടികളും ഔഷധസസ്യങ്ങളും ഉള്‍പ്പടെ പച്ചത്തുരുത്തിന്റെ ഭാഗമാക്കാം​. അധിനിവേശ സസ്യങ്ങളും ഗ്രാഫ്റ്റ് ചെയ-ത ചെടികളും ഉൾപ്പെടുത്തില്ല. സാമൂഹ്യ വനവത്ക്കരണവകുപ്പ്, മഹാത്മാഗാന്ധി ദേശീയ തൊഴിലുറപ്പ് പദ്ധതി, തിരുവനന്തപുരം പാലോട് ട്രോപ്പിക്കൽ ബോട്ടാണിക്കൽ ഗാർഡൻ, മലബാർ ബോട്ടാണിക്കൽ ഗാർഡൻ, കേരള വനഗവേഷണകേന്ദ്രം, സംസ്ഥാന ഔഷധ സസ്യ ബോർഡ് തുടങ്ങിയ സ്ഥാപനങ്ങൾ തൈകൾ ലഭ്യമാക്കുന്നു. റെയിൽവേ വികസനവുമായി ബന്ധപ്പെട്ട്​ എറണാകുളം ജില്ലയിൽ കണ്ടൽകാടുകൾ നശിക്കുന്നതിന്​ പകരമായി 12 ഇടങ്ങളിൽകൂടി പച്ചത്തുരുത്ത്​ സ്ഥാപിക്കും. നശിക്കുന്നതിന്റെ​ മൂന്നിരട്ടി സ്ഥലത്ത്​ പച്ചത്തുരുത്തുകൾ സ്ഥാപിക്കുന്നതിന്​ തദ്ദേശസ്ഥാപനങ്ങൾക്ക്​​ റെയിൽവേ ധനസഹായം നൽകിക്കഴിഞ്ഞു. എറണാകുളത്ത്​ ഒന്ന്​, ആലപ്പുഴയിൽ അഞ്ച്​, കൊല്ലത്ത്​ ആറ്​ വീതം പച്ചത്തുരുത്തുകളാണ്​ തയ്യാറാക്കുക.