കാലാവസ്ഥാ വ്യതിയാനം; 
കേരളതീരത്തെ മത്തി ‘കുഞ്ഞനാ’യി

കൊച്ചി : കേരളതീരത്തുനിന്ന്‌ വലിയ മത്തി അപ്രത്യക്ഷമായതായി പരമ്പരാഗത മത്സ്യത്തൊഴിലാളികൾ. 15 സെന്റിമീറ്ററിലേറെ വലുപ്പമുള്ള മത്തി ഇല്ലാതായതോടെ വിലയും ഗണ്യമായി കുറഞ്ഞു. ഇത്‌ മത്സ്യത്തൊഴിലാളികളുടെ വരുമാനത്തെയും പ്രതികൂലമായി ബാധിച്ചു. 2023 അവസാനംമുതൽ 2024 ഏപ്രിൽവരെ നീണ്ട സമുദ്രോഷ്ണതരംഗം മത്തിയുടെ ലഭ്യതയിൽ മാറ്റങ്ങൾ ഉണ്ടാക്കിയിട്ടുണ്ട്‌. ഈ വ്യതിയാനം കാലക്രമേണ മാറി, അനുകൂല കാലാവസ്ഥയും സുസ്ഥിര മീൻപിടിത്തരീതികളും ഒത്തുവന്നാൽ രണ്ടു വർഷത്തിനുള്ളിൽ സാധാരണ ലഭ്യത പ്രതീക്ഷിക്കുന്നതായി ഗവേഷകർ പറയുന്നു.

വലുപ്പമുള്ള മത്തിക്ക്‌ കഴിഞ്ഞവർഷം കിലോയ്ക്ക്‌ 200 മുതൽ 300 രൂപവരെയാണ്‌ വില ലഭിച്ചിരുന്നത്‌. എന്നാൽ, നിലവിൽ ചെറിയ മത്തിക്ക്‌ 100 രൂപയേ ലഭിക്കുന്നുള്ളൂവെന്ന്‌ മത്സ്യത്തൊഴിലാളി ഐക്യവേദി നേതാവ്‌ ചാൾസ്‌ ജോർജ് പറഞ്ഞു. മാത്രമല്ല, തമിഴ്‌നാട്ടിലെ കോഴിത്തീറ്റ ഫാക്ടറികളിലേക്ക്‌ കിലോയ്‌ക്ക്‌ 16 മുതൽ 30 രൂപവരെ നിരക്കിൽ ഇവ മൊത്തമായി കയറ്റി അയയ്‌ക്കുകയുമാണ്‌. മത്തി അപ്രത്യക്ഷമാകൽ പതിവാണ്. പക്ഷേ, തിരിച്ചുവരവിൽ വളർച്ചാമുരടിപ്പ്‌ ഇതാദ്യമാണ്‌. കാലാവസ്ഥാ വ്യതിയാനങ്ങളാണ്‌ മത്തിയുടെ വളർച്ച മുരടിപ്പിച്ചത്‌. ശരാശരി 100 ഗ്രാം ഉണ്ടായിരുന്ന ഒരു മത്തി ഇപ്പോൾ 25 ഗ്രാം മാത്രമാണെന്നും അദ്ദേഹം പറഞ്ഞു.

കാലാവസ്ഥ അനുകൂലമായി മീൻപിടിത്തം ശരിയായ രീതിയിലായാൽ മത്തി പഴയ നിലവാരത്തിലേക്ക്‌ രണ്ടു വർഷത്തിനുള്ളിൽ തിരിച്ചുവരുമെന്ന്‌ സിഎംഎഫ്‌ആർഐ ഡയറക്‌ടർ ഡോ. ഗ്രിൻസൺ ജോർജ് പറഞ്ഞു. വർഷാവർഷങ്ങളിലെ പല പ്രതിഭാസങ്ങളും മത്തിയുടെ പ്രജനനത്തെയും വളർച്ചയെയും ബാധിക്കാറുണ്ട്‌. പ്രാദേശികമായും വ്യതിയാനങ്ങൾ കാണാറുണ്ട്‌. തെക്കൻ ജില്ലകളിൽ ഇപ്പോൾ 14 മുതൽ 18 സെ. മീറ്റർവരെയാണ്‌ വലുപ്പം. വടക്കൻ ജില്ലകളിൽ ഇത്‌ 12 മുതൽ 14 സെ. മീറ്റർവരെയാണ്‌.