ഒന്നരവർഷം, ചലനശേഷി വീണ്ടെടുത്ത്‌ 76 പേർ; രാജ്യത്തിന്‌ മാതൃകയായി ജി- ഗെയ്റ്റർ

തിരുവനന്തപുരം: പക്ഷാഘാതംവന്ന്‌ ചലനശേഷി നഷ്ടപ്പെട്ട സാഹചര്യത്തിലാണ്‌ തിരുവനന്തപുരം ബീമാപ്പള്ളി സ്വദേശി നിസാമുദീനെ ജനറൽ ആശുപത്രിയിൽ പ്രവേശിപ്പിക്കുന്നത്‌. പിഎംആർ ബ്ലോക്കിൽ അഡ്‌മിറ്റാക്കി ജി- ഗെയ്റ്ററിന്റെ സഹായത്തോടെ ഒരുമാസം പരിശീലിപ്പിച്ചു. ചികിത്സയുടെ ഓരോ ഘട്ടത്തിലും മാറ്റങ്ങളുണ്ടായി. ഒടുവിൽ നടക്കാൻ കഴിഞ്ഞതോടെ പുതുജീവിതം ലഭിച്ച ആശ്വാസത്തിലാണ്‌ വീട്ടിലേക്ക്‌ മടങ്ങിയത്‌.

നിസാമുദീൻ ഉൾപ്പെടെയുള്ള 76 പേർക്കാണ്‌ ജനറൽ ആശുപത്രിയിലെ ജി–- ഗെയ്റ്റർ സഹായകമായത്‌. ലോകോത്തര നിലവാരത്തിലുള്ള ‘ആധുനിക ന്യൂറോ റീഹാബിലിറ്റേഷൻ’ ചികിത്സ ഉറപ്പാക്കാനാണ്‌ 2023 നവംബറിൽ അഡ്വാൻസ് ഗെയ്റ്റ് ട്രെയിനിങ് റോബോട്ടായ ജി– ഗെയ്റ്റർ സ്ഥാപിച്ചത്‌. രാജ്യത്ത്‌ ആദ്യമായാണ്‌ സർക്കാർ ആശുപത്രിയിൽ ഇത്തരത്തിലുള്ള ചികിത്സ നൽകുന്നത്‌. അപകടത്തിൽ ഗുരുതര പരിക്കേറ്റ്‌ ചലനശേഷി നഷ്ടപ്പെട്ടവർ, ഗില്ലൻ ബാരി സിൻഡ്രോം ബാധിച്ചവർ തുടങ്ങിയ രോഗികൾക്കാണ്‌ ജി–- ഗെയ്റ്റർ കരുത്തേകുന്നത്‌. പരിശീലനത്തിന്‌ സംസ്ഥാനത്തെ എല്ലാ ജില്ലകളിൽനിന്നും രോഗികളെത്തുന്നുണ്ടെന്ന്‌ ഡോക്ടർമാർ പറയുന്നു. ദിവസേന അഞ്ചുപേർക്കാണ്‌ ജി–- ഗെയ്‌റ്ററിലൂടെ പരിശീലനം നൽകാനാകുക.

ഒരാൾക്ക്‌ 10 മുതൽ 30 ദിവസം വരെ വേണ്ടിവരും. കൃത്യമായ വിലയിരുത്തലിന്റെ അടിസ്ഥാനത്തിൽ ഘട്ടം ഘട്ടമായാണ്‌ ചലനശേഷി വീണ്ടെടുക്കുന്നത്‌. വിശദ പരിശോധനയ്ക്ക്‌ വിധേയമാക്കി ഡോക്ടർമാരുടെ മേൽനോട്ടത്തിലാണ്‌ പരിശീലനം. രക്തസമ്മർദം പോലുള്ള ബുദ്ധിമുട്ടുണ്ടായാൽ അടിയന്തര സേവനവും ബ്ലോക്കിൽ സജ്ജമാണ്‌.

ജി ഗെയ്റ്റർ

കേരളത്തിന്റെ സ്വന്തം സ്റ്റാർടപ്‌ കമ്പനിയായ ജൻ റോബോടിക്സ്‌ ആണ്‌ ജി– ഗെയ്റ്റർ വികസിപ്പിച്ചത്‌ (https://www.genroboticsmedical.com). ചലനശേഷി നഷ്ടമായവരെ വീണ്ടും നടത്താൻ പഠിപ്പിക്കുന്ന റോബോട്ടാണിത്‌. വേഗത്തിൽ സുഖം പ്രാപിക്കാനും പരമ്പരാഗത ഗെയ്റ്റ് ട്രെയിനിങ്‌ പ്രശ്‌നങ്ങൾക്ക് പരിഹാരം നൽകാനും ഇതിനാകും. നിർമിതബുദ്ധി, റോബോട്ടിക്‌സ് എന്നിവയിലാണ്‌ പ്രവർത്തനം.