കാസർകോട് ഉപ്പള, മൊഗ്രാൽ നദികളിൽ പ്രളയ സാധ്യത മുന്നറിയിപ്പ്; തീരത്തുള്ളവർ ജാഗ്രത പാലിക്കണം

കാസർകോട്: കാസർകോട് വിവിധ നദികളിൽ അപകടകരമായ രീതിയിൽ ജലനിരപ്പുയരുന്നതിനാൽ ജാ​ഗ്രതാ നിർദേശം പുറപ്പെടുവിച്ചു. ജലസേചന വകുപ്പ് പ്രളയ സാധ്യത മുന്നറിയിപ്പ് പുറപ്പെടുവിച്ചു. ഉപ്പള, മൊഗ്രാൽ നദികളിലാണ് ജലനിരപ്പുയരുന്നത്. ഈ നദികളുടെ തീരത്തുള്ളവർ ജാഗ്രത പാലിക്കണമെന്ന് ജില്ലാ കലക്ടർ അറിയിച്ചു.

ഉപ്പള (ഉപ്പള സ്റ്റേഷൻ) ജലനിരപ്പ് മുന്നറിയിപ്പുനിലയും അപകടനിലയും കടന്നു. മൊഗ്രാൽ പുഴയുടെ മധൂർ സ്റ്റേഷൻ ജലനിരപ്പ് മുന്നറിയിപ്പുനില കടന്നിരിക്കുന്നു. ഉപ്പളയിൽ ഓറഞ്ച് അലർട്ടും മൊഗ്രാലിൽ യെല്ലോ അലർട്ടും പ്രഖ്യാപിച്ചിട്ടുണ്ട്.

യാതൊരു കാരണവശാലും നദിയിൽ ഇറങ്ങാനോ നദി മുറിച്ചു കടക്കാനോ പാടില്ല. തീരത്തോട് ചേർന്ന് താമസിക്കുന്നവർ ജാഗ്രത പാലിക്കേണ്ടതാണ്. അധികൃതരുടെ നിർദേശാനുസരണം പ്രളയ സാധ്യതയുള്ളയിടങ്ങളിൽ നിന്ന് മാറി താമസിക്കാൻ തയ്യാറാവണമെന്നും ജില്ലാ കലക്ടർ അറിയിച്ചു.