തിരുവനന്തപുരം മെഡിക്കൽ കോളേജ് ആശുപത്രിയിൽ നേരിയ തീപിടിത്തം; തീയണച്ച് ഫയർഫോഴ്സ്

തിരുവനന്തപുരം : തിരുവവനന്തപുരം മെഡിക്കൽ കോളേജ് ആശുപത്രിയിൽ നേരിയ തീപിടിത്തം. മൾട്ടി സ്പെഷ്യാലിറ്റി ബ്ലോക്കിലെ അത്യാഹിത വിഭാ​ഗത്തിലാണ് തീപിടിത്തമുണ്ടായത്. ഐസിയുവിലെ മുഴുവൻ രോ​ഗികളെയും ജീവനക്കാരെയും മാറ്റി. തീപിടിത്തം നിയന്ത്രണ വിധേയമാണെന്ന് ആശുപത്രി അധികൃതർ അറിയിച്ചു.

തീപിടിത്തവുമായി ബന്ധപ്പെട്ട് ഇതുവരെ യാതൊരു ആശങ്കയും വേണ്ടെന്ന് തിരുവനന്തപുരം മെഡിക്കൽ കോളേജ് സൂപ്രണ്ട് ഡോ. സി ജി ജയചന്ദ്രൻ പ്രതികരിച്ചു. ഒരു രോ​ഗിക്കും ബുദ്ധിമുട്ട് ഉണ്ടായിട്ടില്ല. സ്ഥിതി​ഗതികൾ പരിശോധിച്ചു പൊലീസിന്റെയും ഫയർഫോഴ്സിന്റെയും ആശുപത്രി അധികൃതരുടെയും ഭാ​ഗത്തുനിന്ന് എല്ലാ സഹകരണവും ഉറപ്പാക്കിയിട്ടുണ്ട്. ഐസിയുവിൽ നിന്ന് രോ​ഗികളെ മുഴുവനായും മാറ്റിയതായും തീപിടിത്തത്തിന്റെ വിശദാംശങ്ങൾ തുടർ പരിശോധനക്കു ശേഷം അറിയിക്കുമെന്നും സൂപ്രണ്ട് വ്യക്തമാക്കി.

ഷോർട്ട് സെർക്യൂട്ടാണ് തീപിടിത്തത്തിന് കാരണമെന്നാണ് ഫയർഫോഴ്സിന്റെ പ്രാഥമിക നിഗമനം. തീ പൂർണമായും അണച്ചുവെന്നും ഫയർഫോഴ്സ് അറിയിച്ചു.