മാതൃകയായി വയോജന ബജറ്റ്‌; തദ്ദേശസ്ഥാപനങ്ങളിലെ മുൻ ജനപ്രതിനിധികൾക്ക്‌ ക്ഷേമനിധി

തിരുവനന്തപുരം: ജെന്റർ ബജറ്റിലൂടെ രാജ്യത്തിന്‌ മാതൃക സൃഷ്‌ടിച്ച എൽഡിഎഫ്‌ സർക്കാർ ഇക്കുറി വയോജന ബജറ്റ്‌ അവതരിപ്പിച്ചും മാതൃകയായി. നിലവിലെ ബജറ്റിനൊപ്പം ഇതിനുള്ള പ്രത്യേക രേഖ ഉൾപ്പെടുത്തി. രാജ്യത്ത്‌ ആദ്യമായി വയോജന കമ്മീഷൻ രൂപീകരിച്ച സംസ്ഥാനമാണ്‌ കേരളം. തദ്ദേശഭരണ സ്ഥാപനങ്ങളിലെ മുൻ ജനപ്രതിനിധികൾക്ക്‌ ക്ഷേമനിധി പദ്ധതി ആരംഭിക്കാനും തീരുമാനിച്ചു. ഇതിനായി 250 കോടിരൂപ ബജറ്റിൽ വകയിരുത്തി. പ്രാദേശിക സർക്കാരുകൾക്ക്‌ ഇതിലേക്ക്‌ പണം നൽകാൻ അനുമതിയും നൽകി.