അന്യായ നടപടിയുമായി ഇ ഡി; നോട്ടീസ് കൈമാറാതെ പ്രതിപക്ഷനേതാവിന്റെ വീട്ടിൽ പതിച്ചു

തിരുവനന്തപുരം: സിഎംആർഎൽ- എക്സാലോജിക് ഇടപാടുമായി ബന്ധപ്പെട്ട കേസിന്റെ പേരിൽ അന്യായ ഇടപെടലുമായി എൻഫോഴ്സ്മെന്റ് ഡയറക്ടറേറ്റ്. പ്രതിപക്ഷനേതാവ് പിണറായി വിജയന്റെ തിരുവന്തപുരത്തെ വീട്ടിൽ ഇ ഡി ഉദ്യോ​ഗസ്ഥർ സമൻസ് നോട്ടീസ് പതിച്ചു. നോട്ടീസ് കൈമാറാൻ തയ്യാറാകാതെയാണ് ഇ ഡി ഉദ്യോ​ഗസ്ഥരുടെ നടപടി.

കണ്ണൂരിൽ സിപിഐ എം വിപുലീകൃത ജില്ലാ കമ്മിറ്റി യോ​ഗത്തിൽ പങ്കെടുക്കുകയാണ് പിണറായി. ഇ ഡി ഉദ്യോ​ഗസ്ഥർ വീട്ടിലെത്തിയപ്പോൾ സ്റ്റാഫായ സുനിൽ ഉണ്ടായിരുന്നു. നോട്ടീസ് കൈപ്പറ്റണമെന്ന് ഉദ്യോ​ഗസ്ഥർ സുനിലിനോട് ആവശ്യപ്പെടുകയും ഇതിന് തയ്യാറാകാതിരുന്നതോടെ ഭിത്തിൽ നോട്ടീസ് ഒട്ടിക്കുകയുമായിരുന്നു. തുടർന്ന് സാക്ഷിയായി ഒപ്പിടണമെന്നും ഉദ്യോ​ഗസ്ഥർ ആവശ്യപ്പെട്ടപ്പോൾ സുനിൽ വിസമ്മതിച്ചു. പിന്നാലെ മ്യൂസിയം പൊലീസ് സ്റ്റേഷനിലെ പൊലീസുദ്യോ​ഗസ്ഥർ പ്രതിപക്ഷനേതാവിന്റെ വീടിനടുത്തുള്ള കടക്കാരനോട് സാക്ഷിയായി ഒപ്പിടണമെന്ന് ആവശ്യപ്പെട്ടു. കടക്കാരനും ആവശ്യം നിഷേധിച്ചു. തുടർന്ന് രണ്ട് പൊലീസുദ്യോ​ഗസ്ഥർ തന്നെയാണ് ഇ ഡിക്ക് സാക്ഷിയായി ഒപ്പിട്ടിരിക്കുന്നത്.

23ന് കൊച്ചിയിലെ ഇ ഡി ഓഫീസിൽ ഹാജരാകണമെന്നാണ് നോട്ടീസ്.

വിവരമറിഞ്ഞ് സിപിഐ എം സംസ്ഥാന സെക്രട്ടറിയറ്റം​ഗം വി ശിവൻകുട്ടി ഉൾപ്പെടെയുള്ള നേതാക്കൾ സ്ഥലത്തെത്തി. ഇന്ന് തന്നെ നോട്ടീസ് നൽകാനാണെങ്കിൽ ഇ ഡി ഉദ്യോ​ഗസ്ഥർക്ക് കണ്ണൂരിൽചെന്ന് കൈമാറാമായിരുന്നു. ഇ ഡിയുടെയും പൊലീസിന്റെയും നടപടി കരുതിക്കൂട്ടി അപമാനിക്കുന്നതിന് വേണ്ടിയുള്ളതാണെന്ന് നേതാക്കൾ പറഞ്ഞു.