റെയിൽവേ ഒഴിവുകൾ വെട്ടിക്കുറക്കൽ യുവജനങ്ങളോടുള്ള കേന്ദ്രസർക്കാറിന്റെ വെല്ലുവിളി : ഡിവൈഎഫ്ഐ

തിരുവനന്തപുരം: റെയിൽവേയിൽ അസിസ്റ്റന്റ്‌ ലോക്കോ പൈലറ്റുമാരുടെ നിലവിലുള്ള ഒഴിവുകൾ പകുതിയിലേറെ വെട്ടിക്കുറച്ച റെയിൽവേയുടെ നടപടി തൊഴിൽ തേടുന്ന യുവജനങ്ങളോടുള്ള കേന്ദ്രസർക്കാറിന്റെ വെല്ലുവിളിയാണെന്ന് ഡിവൈഎഫ്ഐ. 2024 ൽ പരീക്ഷ നടത്തുമ്പോൾ ഉണ്ടായിരുന്ന 18799 ഒഴിവുകൾ ആണ് 9970 ആയി റെയിൽവേ വെട്ടിക്കുറച്ചത്.

ഇത് സംബന്ധിച്ച് റെയിൽവേ ബോർഡ് അധികൃതർ സോണൽ ജനറൽ മാനേജർമാർക്ക് ഉത്തരവ് അയച്ചിട്ടുണ്ട്.ലോക്കോ റണ്ണിങ്‌ ജീവനക്കാരുടെ കുറവ്‌ കാരണം യാത്രാ, ചരക്ക്‌ ട്രെയിനുകളുടെ സർവീസ്‌ നടത്തിപ്പ്‌ കടുത്ത സമ്മർദം നേരിടുമ്പോഴാണ്‌ റെയിൽവേയുടെ ഈ നടപടി. ഈ വർഷം തുടക്കത്തിൽ ലോക്കോ റണ്ണിങ്ങ് വിഭാഗത്തിൽ 18,000 ഒഴിവുണ്ടായിരുന്നു. ഈയിടെയായി വർഷം തോറും 3,500 പേരാണ്‌ വിരമിക്കുന്നത്‌.

ഇക്കൊല്ലം അവസാനത്തോടെ 21,000ൽപരം ഒഴിവ്‌ ഉറപ്പാണ്‌. ഈ തസ്‌തികയിലേയ്‌ക്ക് റിക്രൂട്ട്‌ ചെയ്യപ്പെടുന്നവരാണ്‌ പരിശീലനത്തിനുശേഷം ലോക്കോ റണ്ണിങ്ങ് വിഭാഗത്തിൽ നിയമിതരാകുന്നത്‌. കൂട്ടത്തോടെ വിരമിക്കൽ വരുമ്പോൾ മതിയായ പരിശീലനം ലഭിക്കാത്തവരുടെ അഭാവം പ്രതിസന്ധി സൃഷ്ടിക്കുന്നുണ്ട്‌. |

ഇത്തരത്തിലുള്ള പല സാഹചര്യങ്ങളും നിലവിലുണ്ടായിട്ടും ഒഴിവുകൾ വെട്ടിക്കുറച്ച് ഉദ്യോഗാർത്ഥികളെ വഞ്ചിക്കുന്ന നിലപാടാണ് റെയിൽവേ സ്വീകരിക്കുന്നത്. ഇതിനെതിരെ ശക്തമായ പ്രക്ഷോഭം സംഘടിപ്പിക്കുമെന്നും ഒഴിവുകൾ വെട്ടിക്കുറച്ച നടപടി റെയിൽവേ പിൻവലിക്കണമെന്നും ഡിവൈഎഫ്ഐ സംസ്ഥാന സെക്രട്ടറിയേറ്റ് ആവശ്യപ്പെട്ടു.