നീലേശ്വരത്ത് മന്ത്രി ഒ ജെ ജനീഷിനെതിരെ കരിങ്കൊടി പ്രതിഷേധവുമായി ഡിവൈഎഫ്ഐ

നീലേശ്വരം: നീലേശ്വരത്ത് പുരാവസ്തു വകുപ്പിൻ്റെ പരിപാടിക്കായി നീലേശ്വരത്തെത്തിയ മന്ത്രി ഒ ജെ ജെനീഷിനെ ഡി വൈ എഫ് ഐ പ്രവർത്തകർ കരിങ്കൊടി കാണിച്ച് തടഞ്ഞു. കഴിഞ്ഞ ദിവസം തിരുവനന്തപുരം യൂണിവേഴ്സിറ്റി ഹോസ്റ്റലിൽ വിദ്യാർഥികളെ തല്ലിചതച്ച പൊലീസ് നടപടിയിൽ പ്രതിഷേധിച്ചാണ് ഡിവൈഎഫ്ഐ പ്രവർത്തകർ മന്ത്രിക്ക് നേരെ കരിങ്കൊടി ഉയർത്തിയത്. യൂത്ത് കോൺ​ഗ്രസ് മാർച്ചിലുണ്ടായ സംഘർഷത്തിൽ തർക്കപരിഹാരത്തിനായെന്ന പേരിൽ ഹോസ്റ്റൽ കോമ്പൗണ്ടിനുള്ളിലേക്കെത്തിയ പൊലീസ് എസ്എഫ്ഐ വിദ്യാർഥികൾക്ക് നേരെ പ്രകോപനമില്ലാതെ ലാത്തി ചാർജ് നടത്തുകയായിരുന്നു.

അതിക്രൂര മർദനത്തിൽ വിദ്യർഥികളുടെ തലയ്ക്ക് ​ഗുരുതരമായി പരിക്കേറ്റു. മന്ത്രി ഒ ജെ ജനീഷിന്റെ നേതൃത്വത്തിൽ നടന്ന മാർച്ചിലാണ് യൂത്ത് കോൺ​ഗ്രസ് വ്യാപക അക്രമം നടന്നത്. ഷാഫി പറമ്പിൽ എം പിയും അക്രമ സംഭവങ്ങൾക്ക് നേതൃത്വം നൽകിയിരുന്നു. മാർച്ച് യൂണിവേഴ്സിറ്റി കോളേജ് ഹോസ്റ്റലിന് മുന്നിലെത്തിയപ്പോഴേക്കും പ്രവർത്തകർ തീപ്പന്തം ഹോസ്റ്റലിന് അകത്തേക്ക് എറിയുകയായിരുന്നു. തുടർന്നാണ് ഇരുവിഭാ​ഗവും തമ്മിൽ സംഘർഷമുണ്ടായത്. സംഭവത്തിൽ സംസ്ഥാനത്ത് ആകെ പ്രതിഷേധം ആർത്തിരമ്പുകയാണ്.