തുമ്പികളുടെ ലോകത്തിലേക്ക് പുതിയ അഞ്ച് അതിഥികൾ‌ കൂടി

തിരുവനന്തപുരം: പീതാംബരൻ തുമ്പി (Anax indicus), വഴക്കാളി പെരുങ്കണ്ണൻ (Macromia bellicosa), കാട്ടു ചേരാച്ചിറകൻ (Lestes dorothea), ചെറു ചോലക്കടുവ (Merogomphus aryanadensis), ചോപ്പൻ നിഴൽത്തുമ്പി (Protosticta sanguinithorax)... തുമ്പികളുടെ കൂട്ടത്തിലെ പുതുമുഖങ്ങളാണിവ. തിരുവനന്തപുരം വൈൽഡ്‌ലൈഫ് ഡിവിഷനിൽ നടത്തിയ തുമ്പി സർവ്വേയിൽ കണ്ടെത്തിയ 129 ഇനം തുമ്പികളിലെ പുതുമുഖങ്ങളുടെ കാര്യമാണ് പറഞ്ഞത്. ഇവ കൂടാതെ ഈയടുത്തായി കണ്ടെത്തിയ ചെറു ചോലക്കടുവ (Merogomphus aryanadensis), ചോപ്പൻ നിഴൽത്തുമ്പി (Protosticta sanguinithorax) എന്നിവയുമുണ്ട്.

തിരുവനന്തപുരം വൈൽഡ്‌ലൈഫ് ഡിവിഷനിൽ നടത്തിയ തുമ്പി സർവ്വേയിൽ നേരത്തെ കണ്ടെത്തിയത് 121 ഇനം തുമ്പികളെയാണ്. ഇവയിൽ 5 എണ്ണമാണ് പുതുമുഖങ്ങൾ. ഇതോടെ തിരുവനന്തപുരം വൈൽഡ്‌ലൈഫ് ഡിവിഷനിലെ തുമ്പികളുടെ എണ്ണം 129 ആയി. കേരള വനം വന്യജീവി വകുപ്പും സൊസൈറ്റി ഫോർ ഒഡോണേറ്റ് സ്റ്റഡീസും സംയുക്തമായാണ് തുമ്പി സർവ്വേ സംഘടിപ്പിച്ചത്. സെപ്റ്റംബർ 12, 13, 14 തിയ്യതികളിലായി നടന്ന സർവ്വേയിൽ വനം വകുപ്പ് ഉദ്യോഗസ്ഥർക്ക് പുറമെ 25 സന്നദ്ധ പ്രവർത്തകരും പങ്കെടുത്തു,

സെപ്റ്റംബർ 12ന് എബിപി സർക്കിൾ ഫോറസ്‌റ്റ്‌ കൺസർവേറ്റർ എൻ ശ്യാം മോഹൻലാലാണ് ഐഎഫ്എസ് ഉദ്‌ഘാടനം നിർവഹിച്ചത്. തിരുവനന്തപുരം ഡിവിഷൻ വൈൽഡ് ലൈഫ് വാർഡൻ എസ് വി വിനോദ് സർവ്വേയ്ക്ക് തുടക്കം കുറിച്ചു. തുമ്പി നിരീക്ഷകരായ ഡോ. സുജിത് വി ഗോപാലൻ, ഡോ. വിവേക് ചന്ദ്രൻ, മുഹമ്മദ് ഷെരീഫ്, രഞ്ജിത് ജേക്കബ് മാത്യൂസ്, റെജി ചന്ദ്രൻ എന്നിവർ സർവേയ്ക്ക് നേതൃത്വം നൽകി. തിരുവനന്തപുരം വൈൽഡ് ലൈഫ് ഡിവിഷനിലെ പത്ത് ക്യാമ്പുകളിലായാണ് സർവേ നടത്തിയത്. പ്രദേശത്തെ പ്രധാനപ്പെട്ട ആവാസവ്യവസ്ഥകളെല്ലാം നിരീക്ഷണത്തിന് കീഴിൽ വരത്തക്ക വിധത്തിലാണ് ക്യാമ്പുകൾ തെരഞ്ഞെടുത്തത്.

കാട്ടു ചേരാച്ചിറകൻ

തുമ്പികളുടെ ശാസ്ത്രീയ വർ​ഗീകരണത്തിലെ മാറ്റങ്ങൾ ഉൾക്കൊണ്ട് പ്രദേശത്തെ ചതുപ്പു മുളവാലനെ പാറമുത്തൻ മുളവാലൻ (Phylloneura rupestris) എന്നും, വടക്കൻ മുളവാലനെ അഗസ്ത്യമല മുളവാലൻ (Melanoneura agasthyamalaica) എന്നും, മഞ്ഞവരയൻ വർണ്ണത്തുമ്പിയെ അബ്രഹാമി വർണ്ണത്തുമ്പി (Lyriothemis abrahami) എന്നും രേഖപ്പെടുത്തി. പുലിനിന്നകല, അഞ്ചുനാഴികത്തോട് എന്നീ ക്യാമ്പുകളിൽ നിന്നുമാണ് ഏറ്റവും അധികം തുമ്പികളെ കണ്ടെത്തിയത്. തെളിനീരരുവികളിൽ മാത്രം കാണപ്പെടുന്ന അരുവിയൻ തുമ്പികളെ (Torrent Darts) ധാരാളം കാണാനായത് പ്രദേശത്തെ ജലസ്രോതസ്സുകളുടെ ശുദ്ധിയെയും പലയിനം നിഴൽത്തുമ്പികളെ (Shadowdamsels) കണ്ടെത്താനായത് കാടിന്റെ ആരോഗ്യത്തെയും സൂചിപ്പിക്കുന്നതായി വിദഗ്ധർ അഭിപ്രായപ്പെട്ടു. പശ്ചിമഘട്ടത്തിന്റെ വൈരം എന്ന് വിശേഷിക്കപ്പെടുന്ന മേഘവർണ്ണൻ (Calocypha laidlawi) എന്ന സുന്ദരൻ തുമ്പി, പലയിനം മുളവാലൻ തുമ്പികൾ, കോമരത്തുമ്പികൾ എന്നിവയാണ് സർവേയിൽ കണ്ടെത്തിയ മറ്റ് പ്രധാനയിനങ്ങൾ.

ചെറു ചോലക്കടുവ

തെക്കൻ അരുവിയൻ