ഏകപക്ഷീയ മണ്ഡല പുനർനിർണയം: തമിഴ്നാടിന്റെ ഐക്യദാർഢ്യ സമ്മേളനത്തിന് പിന്തുണയുമായി മുഖ്യമന്ത്രി

തിരുവനന്തപുരം : ഏകപക്ഷീയമായി പാർലമെൻ്റ് മണ്ഡല പുനർനിർണയം നടത്താനുള്ള കേന്ദ്രസർക്കാർ ശ്രമത്തിനെതിരെ തമിഴ്നാട് സർക്കാർ നടത്തുന്ന ഐക്യദാർഢ്യ സമ്മേളനത്തിന് മുഖ്യമന്ത്രി പിണറായി വിജയന്റെ പിന്തുണ. ജനാധിപത്യത്തിന്റെയും ഫെഡറലിസത്തിന്റെയും മൂല്യങ്ങൾ കാറ്റിൽ പറത്തി ലോക്സഭാ മണ്ഡലങ്ങൾ പുനർനിർണയിക്കാൻ കേന്ദ്രം നടത്തുന്ന തിരക്കിട്ട നീക്കങ്ങൾക്കെതിരെ ചെന്നൈയിൽ വിളിച്ചു ചേർക്കുന്ന ഐക്യദാർഢ്യ സമ്മേളനത്തിനാണ് മുഖ്യമന്ത്രിയുടെ പിന്തുണ. സമ്മേളനത്തിലേക്ക് മുഖ്യമന്ത്രിയെ തമിഴ്നാട് മുഖ്യമന്ത്രി എം കെ സ്റ്റാലിൻ ക്ഷണിച്ചിരുന്നു.

മുഖ്യമന്ത്രിയുടെ പ്രതിനിധികളായി തമിഴ്നാട് ഐടി മന്ത്രി പളനിവേൽ ത്യാഗരാജൻ, ഡോക്ടർ തമിഴച്ചി തങ്ക പാണ്ഡ്യൻ എംപി എന്നിവർ നേരിട്ട് എത്തിയാണ് മുഖ്യമന്ത്രിയെ ക്ഷണിച്ചത്. ഈ മാസം 22നാണ് ചെന്നൈയിൽ സമ്മേളനം നടക്കുന്നത്. മുഖ്യമന്ത്രിയുടെ ചേമ്പറിൽ എത്തിയ പ്രതിനിധികൾ എം കെ സ്റ്റാലിന്റെ ആത്മകഥ മുഖ്യമന്ത്രിക്ക് സമ്മാനിച്ചു.