print edition എം വി ഗോവിന്ദനെതിരെ
കെ സുധാകരൻ നൽകിയ 
മാനനഷ്ടക്കേസ് തള്ളി

കൊച്ചി: സിപിഐ എം സംസ്ഥാന സെക്രട്ടറി എം വി ​ഗോവിന്ദനെതിരെ കോൺ​ഗ്രസ് നേതാവ് കെ സുധാകരൻ എംപി നൽകിയ മാനനഷ്ടക്കേസ് കോടതി തള്ളി. തെളിവ് നൽകാൻ സുധാകരൻ തുടർച്ചയായി ഹാജരാകാതിരുന്നതോടെയാണ്‌ ജനപ്രതിനിധികളുടെ കേസ് പരി​ഗണിക്കുന്ന പ്രത്യേക കോടതി തള്ളിയത്.

പുരാവസ്തു തട്ടിപ്പ് കേസ് പ്രതി മോൻസൺ മാവുങ്കൽ പ്രായപൂർത്തിയാകാത്ത പെൺകുട്ടിയെ പീഡിപ്പിക്കുമ്പോൾ ആ വീട്ടിൽ സുധാകരനും ഉണ്ടായിരുന്നുവെന്ന അതിജീവിതയുടെ മൊഴി പത്രവാർത്തയായിരുന്നു. ഇ‍ൗ വാർത്ത അടിസ്ഥാനമാക്കി,മൊഴി ഗ‍ൗരവമുള്ളതാണെന്നും സുധാകരനെ ചോദ്യം ചെയ്യാൻ പോകുന്നുവെന്നും എം വി ഗോവിന്ദൻ വാർത്താസമ്മേളനത്തിൽ പരാമർശിച്ചിരുന്നു. ഈ പരാമർശത്തിനെതിരെയായിരുന്നു മാനനഷ്ടക്കേസ്. മാധ്യമ വാർത്തകളെ അടിസ്ഥാനമാക്കിയുള്ള പരാമർശമാണ് നടത്തിയതെന്നും വ്യക്തിഹത്യ നടത്തിയിട്ടില്ലെന്നും ഗോവിന്ദൻ വ്യക്തമാക്കി.