വ്യാജപ്രചാരണങ്ങൾ തള്ളി; എൽഡിഎഫ് മുന്നേറ്റം ജനങ്ങളുടെ നിലപാട് വ്യക്തമാക്കുന്നത്: സിപിഐ എം

തിരുവനന്തപുരം: തദ്ദേശ സ്വയംഭരണ തെരഞ്ഞെടുപ്പ് പടിവാതിൽക്കലെത്തിനിൽക്കെ കേരളത്തിൽ 30 തദ്ദേശ സ്വയംഭരണ വാർഡുകളിലേക്ക് നടന്ന ഉപതെരഞ്ഞെടുപ്പിൽ ഇടതുപക്ഷ ജനാധിപത്യ മുന്നണിക്കുണ്ടായ മികച്ച മുന്നേറ്റം കേരളത്തിലെ ജനങ്ങളുടെ നിലപാട് വ്യക്തമാക്കുന്നതാണെന്ന് സിപിഐ എം. എൽഡിഎഫ് സർക്കാരിനും ഇടതുമുന്നണിക്കും എതിരായി നടക്കുന്നവ്യാജപ്രചാരണങ്ങളെ വോട്ടർമാർ തള്ളിക്കളഞ്ഞതിന്റെ തെളിവാണ് എൽഡിഎഫ് വിജയമെന്നും സിപിഐ എം പ്രസ്താവനയിൽ പറഞ്ഞു.

തിരുവനന്തപുരം കോർപ്പറേഷനിലെ ശ്രീവരാഹം വാർഡ് ഉൾപ്പെടെ 13 ജില്ലകളിലായി രണ്ട്‌ ബ്ലോക്ക്പഞ്ചായത്ത് വാർഡുകൾ, മൂന്ന് മുനിസിപ്പാലിറ്റി വാർഡുകൾ, 24 ഗ്രാമപഞ്ചായത്ത് വാർഡുകൾ എന്നിവയിലാണ് ഉപതെരഞ്ഞെടുപ്പ് നടന്നത്. ഗ്രാമപഞ്ചായത്തിൽ 24 വാർഡിൽ 13 വാർഡിലും എൽഡിഎഫ് വിജയിച്ചു. തിരുവനന്തപുരം പൂവച്ചൽ പഞ്ചായത്തിലെ പുളിങ്കോട് വാർഡും ഇടുക്കി പഞ്ചായത്ത് വാത്തുക്കുടി വാർഡും എറണാകുളം പൈങ്ങോട്ടൂർ പഞ്ചായത്ത് പനങ്കര വാർഡും യുഡിഎഫിൽനിന്ന് എൽഡിഎഫ്‌ പിടിച്ചെടുത്തു. കാസർകോട് ജില്ലയിലെ രണ്ട് വാർഡുകളിൽ നേരത്തെ തന്നെ എൽഡിഎഫ് എതിരില്ലാതെ വിജയിച്ചിരുന്നു.