നാളെ.. നാളെ.. നീളെ.. നീളെ! കോൺഗ്രസ് രണ്ടാം പട്ടിക ഇന്നും പുറത്തിറങ്ങില്ല

തിരുവനന്തപുരം : കോൺ​ഗ്രസിന്റെ രണ്ടാംഘട്ട സ്ഥാനാർഥി പട്ടിക വീണ്ടും വൈകും. രാത്രി ഏറെ വൈകിയും ഹൈക്കമാൻഡ് യോ​ഗം ചേരുകയാണ്. യോ​ഗം നീളുന്ന സാഹചര്യത്തിൽ പട്ടിക പുറത്തുവരാൻ വൈകുമെന്ന് തീർച്ചയായി. പല സീറ്റുകളിലും തർക്കം തുടരുന്നതിനാലും ഒരു പേരിലേക്ക് എത്താൻ കഴിയാത്തതിനാലുമാണ് പട്ടിക നീളുന്നത്. കോൺ​ഗ്രസിന്റെ മുതിർന്ന സംസ്ഥാന കേന്ദ്ര നേതാക്കളെല്ലാം ഡൽഹിയിൽ യോ​ഗത്തിൽ പങ്കെടുക്കുന്നുണ്ട്.

കണ്ണൂരും കോന്നിയും ഉൾപ്പടെയുള്ള ചില സീറ്റുകൾ ഒഴിച്ചിട്ട് ബുധനാഴ്ച വൈകീട്ടോടെ രണ്ടാംഘട്ട പട്ടിക പുറത്തിറക്കാൻ കഴിയാതെ നട്ടം തിരിയുകയാണ് കോൺ​ഗ്രസ് നേതൃത്വം. തെരഞ്ഞെടുപ്പ് പ്രഖ്യാപിച്ച് 24 മണിക്കൂറിനുള്ളിൽ സ്ഥാനാർഥികളെ പ്രഖ്യാപിക്കുമെന്ന് പറഞ്ഞ കോൺ​ഗ്രസ് വിമർശനങ്ങൾ വന്നതോടെ കഴിഞ്ഞദിവസം 55 പേരുടെ ആദ്യഘട്ട സ്ഥാനാർഥി പട്ടിക പുറത്തിറക്കിയിരുന്നു. ബുധനാഴ്ച തന്നെ രണ്ടാംഘട്ട പട്ടിക പുറത്തിറക്കുമെന്നും പ്രഖ്യാപിച്ചിരുന്നു. എന്നാൽ, ബുധനാഴ്ച രാത്രി പതിനൊന്നു മണി കഴിഞ്ഞിട്ടും രണ്ടാംഘട്ട പട്ടികയുടെ കാര്യത്തിൽ തീരുമാനമായിട്ടില്ല.