മുഖംസംരക്ഷിക്കാൻ കോൺഗ്രസ് മുഖപത്രവും; മാങ്കൂട്ടത്തിലിനെ ന്യായീകരിച്ചും പരാതിക്കാരിയെ അധിക്ഷേപിച്ചും വീക്ഷണം

തിരുവനന്തപുരം: കോൺഗ്രസ് നേതാക്കൾക്ക് പിന്നാലെ ലൈം​ഗികപീഡനവും ​നിർബന്ധിത ​ഗർഭഛിദ്രവും നടത്തിയെന്ന യുവതിയുടെ പരാതിയിൽ കേസ് നേരിടുന്ന പ്രതി മാങ്കൂട്ടത്തിലിനെ സംരക്ഷിച്ച് മുഖപത്രവും. ഒളിവിൽ പോയ മാങ്കൂട്ടത്തിലിന് പൂർണ പിന്തുണയാണ് കോൺഗ്രസ് മുഖപത്രം വീക്ഷണം എഡിറ്റോറിയലിലൂടെ വ്യക്തമാക്കിയത്.

രാഷ്ട്രീയ ഗൂഢാലോചനയുടെ ഇരയാണ് രാഹുൽ മാങ്കൂട്ടത്തിൽ എന്നാണ് പത്രത്തിന്റെ ന്യായീകരണം. 'പാലക്കാട് ഉപതെരഞ്ഞെടുപ്പിൽ എൽഡിഎഫിനെയും ബിജെപിയെയും ചരിത്ര ഭൂരിപക്ഷത്തിൽ തോൽപ്പിച്ചതായിരുന്നു രാഹുൽ ചെയ്ത കുറ്റം. രാഹുലിൻ്റെ തലമുറയിൽപെട്ട ഒരു പറ്റം ചെറുപ്പക്കാർ കോൺ​ഗ്രസിൽ വളർന്നു വരുന്നത് ഭീതി പടർത്തിയിരിക്കുകയാണ്. അപവാദങ്ങളിൽ പതറാതെയും വ്യക്തിഹത്യകളിൽ തളരാതെയും ജാ​ഗ്രതയോടെ മുന്നോട്ട് പോകണം.' - വീക്ഷണം എഴുതി.

അതേസമയം, രാഹുൽ മാങ്കൂട്ടത്തിലിനെതിരെ നടപടി എടുക്കാൻ മടിക്കുകയാണ് കോൺ​ഗ്രസ്. മാങ്കൂട്ടത്തിലിനെതിരെ കൂടുതൽ നടപടി വേണ്ടെന്നാണ് നേതൃതലത്തിലെ തീരുമാനം. എംഎൽഎ സ്ഥാനം രാജിവെക്കാനും ആവശ്യപ്പെടില്ല.

ആരോപണങ്ങൾ ഉയർന്നഘട്ടത്തിൽതന്നെ മാങ്കൂട്ടത്തിലിനെ സസ്പെൻഡ് ചെയ്തിരുന്നു എന്ന ന്യായീകരണമാണ് നേതാക്കൾ ഉയർത്തുന്നത്. എന്നാൽ സസ്പെൻഷന് ശേഷവും നേതൃത്വത്തിന്റെ സംരക്ഷണയിലാണ് മാങ്കൂട്ടത്തിൽ പുറത്തിറങ്ങിയത്. മണ്ഡലമായ പാലക്കാട് വിവിധ പരിപാടികളിൽ യുഡിഎഫ് നേതാക്കൾ ക്ഷണിക്കുകയും ചെയ്തിരുന്നു. തദ്ദേശ തെരഞ്ഞെടുപ്പിൽ യുഡിഎഫ് നേതാക്കൾക്കായി സജീവപ്രചാരണത്തിനും മാങ്കൂട്ടത്തിൽ ഇറങ്ങി. തന്നോട് പ്രചാരണത്തിന് ഇറങ്ങേണ്ടെന്ന് ആരും പറഞ്ഞിട്ടില്ലെന്ന് മാങ്കൂട്ടത്തിൽ സ്ഥിരീകരിക്കുകയും ചെയ്തു.

മാങ്കൂട്ടത്തിലിനെ ന്യായീകരിച്ചും അതീജീവിതയെ അധിക്ഷേപിച്ചുമാണ് യുഡിഎഫ് കൺവീനർ അടൂർ പ്രകാശ് പ്രതികരിച്ചത്. മാങ്കൂട്ടത്തിലിനെതിരെയുള്ളത് സിപിഐ എം ഉണ്ടാക്കിയ കെണിയാണെന്നും, അതിജീവിത സിപിഐ എമ്മിന് കിട്ടിയ ഇരയാണെന്നുമായിരുന്നു അടൂർ പ്രകാശിന്റെ ആക്ഷേപം. മുഖ്യമന്ത്രിയുടെ ഓഫീസിലേക്ക് വിളിച്ചുവരുത്തി പരാതി എഴുതിവാങ്ങിയെന്ന് എം എം ഹസനും ആരോപിച്ചു. ഇത്രയുംനാൾ പരാതിക്കാരി ഒളിവിലായിരുന്നോ എന്നായിരുന്നു പാലക്കാട് ഡിസിസി പ്രസിഡന്റ് എ തങ്കപ്പന്റെ പരിഹാസം. ഇതിനിടെ സോഷ്യൽമീ‍ഡിയയിലൂടെ മാങ്കൂട്ടത്തിലിന്റെ കീഴിലുള്ള സൈബർസംഘം യുവതിക്കെതിരെ അധിക്ഷേപപ്രചാരണം നടത്തുകയും ചെയ്യുന്നുണ്ട്.