ആരോ​ഗ്യമേഖലയിലെ കോർപറേറ്റുകളിൽ നിന്ന് നിന്ന് കോൺഗ്രസ് വാങ്ങിയത് കോടികളുടെ ഇലക്ടറൽ ബോണ്ട്

ലോകോത്തര നിലവാരത്തിലുള്ള കേരളത്തിലെ ആരോ​ഗ്യമേഖലയെ കുറ്റം പറഞ്ഞ് തകർക്കാൻ ശ്രമിക്കുന്ന കോൺ​ഗ്രസ് ആരോ​ഗ്യ രം​ഗത്തുള്ള കുത്തക - വൻകിട സ്വകാര്യ കമ്പനികളിൽ നിന്ന് ഇലക്ടറൽ ബോണ്ട് വഴി വാങ്ങിയത് കോടിക്കണക്കിന് രൂപ. ഇലക്ടറൽ ബോണ്ടുകൾ വാങ്ങിയ പാർടികളുടെയും നൽകിയ കമ്പനികളുടെയും കണക്ക് പരിശോധിക്കുമ്പോൾ 3,141 കമ്പനികളിൽ നിന്നായി 1500 കോടി രൂപയോളമാണ് കോൺഗ്രസ് ഇലക്ടറൽ ബോണ്ടായി വാങ്ങിയത്. ഇതിൽ ആരോ​ഗ്യ രം​ഗത്ത് പ്രവർത്തിക്കുന്ന പതിനഞ്ചോളം കമ്പനികളിൽ നിന്നായി ലഭിച്ച കോടികളുമുണ്ട്. പ്രധാന ഔഷധ നിർമ്മാണ കമ്പനികൾ, ആശുപത്രി ശൃംഖലകൾ, മെഡിക്കൽ റീട്ടെയിൽ സ്ഥാപനങ്ങൾ, ലാബ് / എപിഐ നിർമാതാക്കൾ, ഹെൽത്ത് ടെക്നോളജി എന്നിങ്ങനെ ആരോ​ഗ്യ രം​ഗത്ത് വിവിധ മേഖലകളിൽ പ്രവർത്തിക്കുന്ന കമ്പനികളിൽ നിന്ന് കോടികൾ വാങ്ങിയ ശേഷമാണ് കോൺ​ഗ്രസ് കേരളത്തിലെ ആരോ​ഗ്യ രം​ഗത്തിനും സർക്കാരിനുമെതിരെ ആക്രമണം നടത്തുന്നത്.

മൾട്ടി- സ്പെഷ്യാലിറ്റി ആശുപത്രി ശൃംഖലയായ യശോദ സൂപ്പർ സ്പെഷ്യാലിറ്റി ( Yashoda Super Speciality Hospital), ഫാർമസി / മെഡിക്കൽ റീട്ടെയിൽ സ്ഥാപനങ്ങളായ ലക്ഷ്മി മെഡിക്കൽസ് (Lakshmi Medicals), ധീരജ് മെഡിക്കൽസ് ( Dheeraj Medicals) എന്നിവിടങ്ങളിൽ നിന്നായി കോൺ​ഗ്രസ് വാങ്ങിയത് 69 കോടി രൂപയാണ്. യശോദ സൂപ്പർ സ്പെഷ്യാലിറ്റിയിൽ നിന്നാണ് ഇലക്ടറൽ ബോണ്ടായി ഏറ്റവുമധികം തുക വാങ്ങിയത്. 64 കോടി രൂപ.

ഫാർമസ്യൂട്ടിക്കൽ & ലൈഫ് സയൻസസ് കമ്പനികൾ വഴി കോൺ​ഗ്രസിന് കിട്ടിയത് 74 കോടി രൂപയാണ്. ഡോ. റെഡ്ഡീസ് ലബോറട്ടറീസ് ലിമിറ്റഡ് (Dr. Reddy’s Laboratories Limited- 11 കോടി), നാറ്റ്കോ ഫാർമ ലിമിറ്റഡ് (Natco Pharma Limited – 12.5 കോടി), ടോറന്റ് ഫാർമസ്യൂട്ടിക്കൽസ് ലിമിറ്റഡ് (Torrent Pharmaceuticals Limited – 21 കോടി), ഡിവീസ് ലബോറട്ടറീസ് ലിമിറ്റഡ് (Divi’s Laboratories Limited - 5 കോടി ), സിപ്ല ലിമിറ്റഡ് (Cipla Limited– 17 കോടി), സൈഡസ് ഹെൽത്ത്‌കെയർ ലിമിറ്റഡ് (Zydus Healthcare Limited – 2 കോടി) മൈക്രോ ലാബ്സ് ലിമിറ്റഡ് (Micro Labs Limited – 3 കോടി ), അജന്ത ഫാർമ ലിമിറ്റഡ് (Ajanta Pharma Ltd – 1 കോടി ), ജൂബിലന്റ് ലൈഫ് സയൻസസ് ലിമിറ്റഡ് (Jubilant Life Sciences Limited – 1 കോടി ) എന്നിങ്ങനെയാണ് കണക്കുകൾ.

മെഡിക്കൽ ഉപകരണങ്ങൾ, ഹെൽത്ത് ടെക്നോളജി, ലാബ് തുടങ്ങിയവയുമായി ബന്ധപ്പെട്ട സ്ഥാപനങ്ങളായ ഹൊറൈസൺ മെഡിക്കൽ സപ്ലൈസ് (Horizon Medical Supplies- 4 കോടി), ഡോ. ഹെൽത്ത്‌ടെക് (Dr Healthtech - 80 ലക്ഷം), ദസാമി ലാബ് പ്രൈവറ്റ് ലിമിറ്റഡ് (Dasami Lab Pvt Ltd- 5 കോടി) എന്നീ സ്ഥാപനങ്ങളിൽ നിന്നും കോൺ​ഗ്രസ് ഇലക്ടറൽ ബോണ്ട് വാങ്ങിയതായി വിവരങ്ങളുണ്ട്.

ആരോ​ഗ്യമേഖലയിലെ കുത്തക മുതലാളിമാരിൽ നിന്ന് വൻതുക വാങ്ങിയ ശേഷമാണ് സർക്കാരിനും സർക്കാർ ആശുപത്രികൾക്കുമെതിരെ കോൺഗ്രസ് രം​ഗത്തുവന്നിരിക്കുന്നത്.