കാലാവസ്ഥാവ്യതിയാനം സമുദ്രമത്സ്യ
മേഖലയ്​ക്ക്​ തിരിച്ചടിയെന്ന്​ ശാസ്ത്രജ്ഞർ

കൊച്ചി

കാലാവസ്ഥാ വ്യതിയാനം സമുദ്രമത്സ്യ മേഖലയെ ഗുരുതരമായി ബാധിക്കുന്നതായി സമുദ്രശാസ്ത്രജ്ഞരുടെ മുന്നറിയിപ്പ്. മീനുകളുടെ ജൈവപരമായ മാറ്റങ്ങൾ, പാരിസ്ഥിതിക വ്യതിയാനങ്ങൾ തുടങ്ങി അനേകം പ്രത്യാഘാതങ്ങൾക്ക് കാലാവസ്ഥാ വ്യതിയാനം കാരണമാകുന്നതായി ഇന്ത്യൻ കൗൺസിൽ ഓഫ് സോഷ്യൽ സയൻസ് റിസർച്ച്​, കേന്ദ്ര സമുദ്രമത്സ്യ ഗവേഷണസ്ഥാപനം, ഇൻസ്റ്റിറ്റ്യൂട്ട് ഓഫ് സോഷ്യൽ സയൻസ്​ എന്നിവ ചേർന്ന്​ കൊച്ചിയിൽ സംഘടിപ്പിച്ച സെമിനാറിൽ സമുദ്രശാസ്ത്രജ്ഞർ വ്യക്തമാക്കി.

ഫിഷറീസ്​ സർവേ ഓഫ് ഇന്ത്യ ഡയറക്ടർ ഡോ. കെ ആർ ശ്രീനാഥ് സെമിനാർ ഉദ്ഘാടനം ചെയ്തു. മീനുകളുടെ ജീവിതചക്രത്തിൽ വലിയ മാറ്റങ്ങൾ സംഭവിക്കുന്നതായി സെമിനാറിൽ അധ്യക്ഷനായ സിഎംഎഫ്ആർഐ ഡയറക്ടർ ഡോ. ഗ്രിൻസൺ ജോർജ് പറഞ്ഞു. പല മീനുകളും വളർച്ചയെത്താതെ പ്രജനനത്തിന് പാകമാകുന്നു. മാത്രമല്ല, തീരദേശ ചെമ്മീനുകൾ, മത്തി, അയല എന്നിവയുടെ വലിപ്പവും പ്രത്യുൽപ്പാദനശേഷിയും കുറയുന്നത് മത്സ്യസമ്പത്തിനെ ബാധിക്കുന്നു. ഭക്ഷ്യലഭ്യത, മഴ, സമുദ്രത്തിലെ ജലപ്രവാഹം, ഓക്സിജന്റെ അളവ് എന്നിവയിലുണ്ടായ മാറ്റങ്ങൾ കാരണം മത്തിപോലുള്ള മീനുകൾ അനുകൂലമായ പ്രദേശങ്ങളിലേക്ക് പലായനം ചെയ്യുന്നതായും അദ്ദേഹം പറഞ്ഞു.

കാലാവസ്ഥാ വ്യതിയാനം കാരണം രണ്ടായിരത്തിനുശേഷം തീരശോഷണം ഗണ്യമായി വർധിച്ചുവരികയാണെന്ന് സിക്കിം സർക്കാരിന്റെ കാലാവസ്ഥാ വ്യതിയാന ഉപദേഷ്ടാവ് പ്രൊഫ. വിനോദ് ശർമ പറഞ്ഞു. സെമിനാർ ബുധനാഴ്ച സമാപിക്കും.