കേന്ദ്ര കോർപറേറ്റ് നയങ്ങൾ രാജ്യത്തിന്റെ സമ്പത്ത് വ്യവസ്ഥയെ തകർക്കുന്നു: തപൻസെൻ

തൃശൂർ: കേന്ദ്രസർക്കാരിന്റെ കോർപറേറ്റ് അനുകൂലനയങ്ങൾ രാജ്യത്തെ സമ്പത്ത് വ്യവസ്ഥ തകർക്കുകയാണെന്ന് സിഐടിയു ദേശീയ ജനറൽ സെക്രട്ടറി തപൻസെൻ പറഞ്ഞു. എന്നാൽ നവലിബറൽ സാമ്പത്തിക നയങ്ങൾക്ക് ബദലാണ് കേരളം ഉയർത്തിപ്പിടിക്കുന്നത്. ജനപക്ഷ ബദലുകൾ വഴി മൂന്നാം ഭരണം നേടാനാവും. സാധാരണക്കാരുടെ സാമ്പത്തിക ആവശ്യങ്ങൾ നിറവേറ്റാനുള്ള കെഎസ്എഫ്ഇ ഇത്തരം ബദൽ മാതൃകകളിൽ ഒന്നാണ്. കെഎസ്എഫ്ഇ സ്റ്റാഫ് അസോസിയേഷൻ (സിഐടിയു) 31–ാം സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

രാജ്യത്തിന്റെ സമ്പത്ത് കോർപറേറ്റുകൾ കൊള്ളയടിക്കുന്നവർക്ക് കേന്ദ്രസർക്കാർ എല്ലാ സ‍ൗകര്യങ്ങളും ഒരുക്കുന്നു. ഇതിനെതിരെ സമരം ചെയ്യുന്നവരെ ജാമ്യമില്ലാത്ത വകുപ്പുകൾ ചേർത്ത് കള്ളക്കേസുകളിൽ കുടുക്കി ജയിലിൽ അടക്കുകയാണ്. ധനമൂലധന ശക്തികളുടെ ലക്ഷ്യം ലാഭം മാത്രമാണ്. അവർക്ക് രാജ്യത്ത് സാമ്പത്തിക വളർച്ചയും ഉൽപാദനവും വേണമെന്നില്ല, തൊഴിലാളികൾക്ക് തൊഴിൽ വേണമെന്നില്ല. ഉ‍ൗഹക്കച്ചവടമാണ് അടിസ്ഥാനം. ഇതിന് അനുകൂലമായ സാഹര്യങ്ങളാണ് കേന്ദ്രസർക്കാർ ഒരുക്കുന്നത്. കോർപറേറ്റുകൾക്ക് കോടികൾ ഇളവുകൾ നൽകുന്നു.

കേന്ദ്രസർക്കാരിന്റെ തൊഴിലാളി വിരുദ്ധ ലേബർ കോഡുകൾ പണിയെടുക്കുന്നവന്റെ എല്ലാ അവകാശങ്ങളും കവരുകയാണ്. ഇതിനെതിരെ എല്ലാ തൊഴിലാളി വിഭാഗങ്ങളും ഒന്നിക്കണം. ജൂലൈ ഒമ്പതിലെ പണിമുടക്ക് തൊഴിലാളി ഐക്യത്തിന്റെ പുതിയ രൂപമാണ്. തുടർച്ചയായ പോരാട്ടങ്ങൾ നടത്താൻ സിഐടിയു മുന്നിലുണ്ട്. തൊഴിലാളികൾ മാത്രമല്ല, കുടുംബാംഗങ്ങളേയും സമരമുഖങ്ങളിൽ കണ്ണികളാവണം. കോർപറേറ്റ്– വർഗീയ– നവ ഫാസിസ്റ്റ് സംഖ്യമാണ് രാജ്യം ഭരിക്കുന്നത്. ഭരണഘടനാ അവകാശങ്ങൾ കവരുന്നു. ജനാധിപത്യമൂല്യങ്ങളും ഇല്ലാതാക്കുന്നു. ഛത്തീശ്ഗഡിലെ അനുഭവം ഇതിന് തെളിവാണ്.

കോർപറേറ്റ് നയങ്ങൾക്ക് ബദൽ നയങ്ങളാണ് കേരളത്തിൽ ഇടതുപക്ഷ സർക്കാർ നടപ്പാക്കുന്നത്. ഇ‍ൗ സർക്കാരിനെ നിലനിർത്തണ്ടതിന്റെ ആവശ്യകത ജനങ്ങളെ ബോധ്യപ്പെടുത്താനാവണമെന്നും തപൻസെൻ പറഞ്ഞു