തുടർപഠന തൊഴിൽ മേഖലകളെ കുറിച്ച് ധാരണ നൽകാൻ കരിയർ പ്രയാണം പോർട്ടൽ

തിരുവനന്തപുരം : തുടർപഠന തൊഴിൽ മേഖലകളെ കുറിച്ച് വ്യക്തമായ ധാരണ നൽകാൻ പൊതുവിദ്യാഭ്യാസ വകുപ്പ്, കരിയർ ഗൈഡൻസ് ആൻഡ് അഡോളസന്റ് കൗൺസലിങ്ങ് സെല്ലിന്റെ നേതൃത്വത്തിൽ കരിയർ പ്രയാണം എന്ന പേരിൽ കരിയർ ഗൈഡൻസ് പോർട്ടൽ തയ്യാറാക്കിയിട്ടുണ്ടെന്ന് പൊതുവിദ്യാഭ്യാസമന്ത്രി വി ശിവൻകുട്ടി. യൂണിസെഫിന്റെ സാമ്പത്തിക സഹായത്തോടെ സംസ്ഥാനത്തെ വിവിധ ഹയർ സെക്കൻഡറികളിൽ പ്രവർത്തിക്കുന്ന, വിദ്യാഭ്യാസവകുപ്പ് തന്നെ വിദഗ്ധ പരിശീലനം നൽകിയിട്ടുള്ള കരിയർ ഗൈഡുമാരാണ് ആവശ്യമായ വിവരങ്ങൾ തയാറാക്കി നൽകിയത്. കൈറ്റാണ് സോഫ്റ്റ്‌വെയർ തയാറാക്കിയത്.

24 തൊഴിൽ മേഖലകളിലായി 407 തൊഴിലുകളാണ് ഒന്നാംഘട്ടത്തിൽ ഉൾപ്പെടുത്തിയിട്ടുള്ളത്. 877 പ്രീമിയർ സ്ഥാപനങ്ങൾ, രാജ്യത്തെ ഏറ്റവും പ്രധാനപ്പെട്ട 969 തൊഴിലുടമകൾ എന്നീ വിവരങ്ങൾ പോർട്ടലിൽ ലഭ്യമാണ്. ഓരോ തൊഴിലിന്റെയും യോഗ്യത, കോഴ്‌സുകൾ, സ്ഥാപനങ്ങൾ, വേണ്ട യോ​ഗ്യത, ഉത്തരവാദിത്തങ്ങൾ, ഉന്നതപഠന സാധ്യതകൾ, മേഖലയിലെ പ്രഗത്ഭരായ വ്യക്തിത്വങ്ങൾ തുടങ്ങിയവയും പോർട്ടലിൽ ഉൾക്കൊള്ളിച്ചിട്ടുണ്ട്. അഡ്മിഷനുമായി ബന്ധപ്പെട്ട അറിയിപ്പുകൾ, എൻട്രൻസ് പരീക്ഷകൾ, സ്‌കോളർഷിപ്പുകൾ എന്നിവയെക്കുറിച്ചുള്ള വിവരങ്ങൾ പോർട്ടലിലുണ്ട്.

വിദ്യാർഥികളുടെ സംശയങ്ങൾ ദൂരികരിക്കുന്നതിനും ആവശ്യമായ മാർഗ നിർദ്ദേശം നൽകുന്നതിനും പരിശീലനം ലഭിച്ച 6,687 കരിയർ ഗൈഡുമാർ സംസ്ഥാനത്ത് ലഭ്യമാണ്. ഈ അധ്യാപകരാണ് സ്‌കൂളുകളിലെ കരിയർ ഗൈഡൻസ് യൂണിറ്റുകൾക്ക് നേതൃത്വം നൽകുന്നത്.

എൽഎസ്എസ് യുഎസ്എസ് സർട്ടിഫിക്കറ്റുകൾ

ഈ വർഷം മുതൽ എൽഎസ്എസ് - യുഎസ്എസ് സർട്ടിഫിക്കറ്റുകൾ പ്രഥമാധ്യാപകരുടെ ലോഗിൻ മുഖേന ഡൗൺലോഡ് ചെയ്യത്തക്ക വിധം ക്രമീകരിക്കുകയാണ്. സർട്ടിഫിക്കറ്റുകൾ ലഭിക്കുന്നതിലെ കാലതാമസം ഇതിലൂടെ ഒഴിവാക്കാൻ കഴിയും.