"ദീലീപിനെതിരെ സംസാരിച്ചാൽ മുഖത്ത് ആസിഡ് ഒഴിക്കും"; ഭാ​ഗ്യലക്ഷ്മിയ്ക്ക് ഭീഷണി കോൾ

കൊച്ചി: നടിയെ ആക്രമിച്ചകേസുമായി ബന്ധപ്പെട്ട് നടൻ ദിലീപിനെതിരെ സംസാരിച്ചാൽ ആക്രമിക്കുമെന്ന് ഭീഷണിപ്പെടുത്തിയതായി ചലച്ചിത്രപ്രവർത്തക ഭാ​ഗ്യലക്ഷ്മി. മുഖത്ത് ആസിഡ് ഒഴിക്കുമെന്ന് ഫോണിലൂടെയായിരുന്നു ഭീഷണി. സംഭവത്തിൽ പരാതി നൽകുമെന്ന് ഭാ​ഗ്യലക്ഷ്മി മാധ്യമങ്ങളോട് പറഞ്ഞു.

വെള്ളി ഉച്ചയ്ക്കാണ് ഫോൺ കോൾ വന്നത്. 'നീ ഇനിയും ദിലീപേട്ടനെതിരെ പറയുമോടീ, നിന്റെ മുഖത്ത് ആസിഡ് ഒഴിക്കും' എന്ന് ഭീഷണിപ്പെടുത്തുകയും, അസഭ്യവർഷം നടത്തുകയും ചെയ്തതായി ഭാ​ഗ്യലക്ഷ്മി പറഞ്ഞു.

സോഷ്യൽമീഡിയ വഴിയും തനിക്കെതിരെ നിരന്തരം ആക്രമണം നടത്തുന്നുണ്ട്. സിനിമയിലുള്ള ആരുംതന്നെ ദിലീപിനെതിരെ സംസാരിക്കുന്നില്ല. ഒരു ഭീഷണിക്കും തന്നെ തളർത്താനാകില്ല. തനിക്കെന്തെങ്കിലും സംഭവിച്ചാൽ അതിന്റെ പൂർണ ഉത്തരവാദി ദിലീപാണെന്നും ഭാ​ഗ്യലക്ഷ്മി പറഞ്ഞു.