വന്ദേഭാരത് വൈകിയത് ആറ് മണിക്കൂർ; വലഞ്ഞ് ബംഗളുരു മലയാളികൾ

കൊച്ചി: ബംഗളുരുവിൽ നിന്ന് കേരളത്തിലേക്കുള്ള വന്ദേഭാരത് വൈകിയത് ആറ് മണിക്കൂർ. ഞായറാഴ്ചത്തെ ബെംഗളൂരു-എറണാകുളം വന്ദേഭാരത് എക്സ്പ്രസാണ് യാത്രക്കാരെ വെട്ടിലാക്കിക്കൊണ്ട് ആറ് മണിക്കൂർ വൈകിയോടിയത്. മുൻകൂട്ടി അറിയിപ്പൊന്നും ലഭിക്കാതെയാണ് ട്രെയിൻ വൈകിയോടിയത്.

പല യാത്രക്കാരും മറ്റു വഴികൾ പോലും തേടാനാകാതെ മണിക്കൂറുകളോളം സ്റ്റേഷനിൽ ചെലവഴിക്കുകയായിരുന്നു. രാവിലെ 5.15-ന് പുറപ്പെടേണ്ട വണ്ടി ആറ് മണിക്കൂറോളം വൈകിയതിനെ തുടർന്ന് എറണാകുളം ജങ്ഷനിൽ നിന്ന് ബെംഗളുരുവിലേക്ക് ഉച്ചയ്ക്ക് 2.20 ന് പുറപ്പെടേണ്ട വന്ദേഭാരതും രാത്രി എട്ടരയോടെയാണ് പുറപ്പെട്ടത്. ഓണാവധി കണക്കിലെടുത്ത് നാട്ടിലേക്ക് തിരിക്കാനിരുന്ന മലയാളികൾക്ക് റയിൽവെയുടെ കൈയിൽ നിന്ന് ഇരുട്ടടി കിട്ടിയ അവസ്ഥയാണ്.