കോഴിക്കോട് ബേബി മെമ്മോറിയൽ ആശുപത്രിയിൽ തീപിടിത്തം; നിയന്ത്രണ വിധേയം

കോഴിക്കോട്: കോഴിക്കോട് ബേബി മെമ്മോറിയൽ ആശുപത്രിയിൽ തീപിടിത്തം. ആശുപത്രിയുടെ സി ബ്ലോക്കിലായി മുകൾ നിലയിലാണ് തീപിടിത്തം. എല്ലാവരും സുരക്ഷിതരാണെന്നും ആരും ഇല്ലാത്ത സ്ഥലത്താണ് തീപിടിത്തമുണ്ടായതെന്നും അധികൃതർ അറിയിച്ചു.

വൻതോതിൽ പുക ഉയർന്നത് പരിഭ്രാന്തിക്കിടയാക്കിയെങ്കിലും, കൃത്യമായ ഇടപെടലുകൾ വഴി വൻ ദുരന്തം ഒഴിവായി.

തീപിടിത്തമുണ്ടായ കെട്ടിടത്തിന്റെ മുകൾനിലയിൽ നിന്നും സമീപത്തെ വാര്‍ഡുകളിലേക്കും പുക വ്യാപിച്ചു. ഉടൻ തന്നെ ആശുപത്രി അധികൃതർ അറിയിച്ചതനുസരിച്ച് ഫയർ ഫോഴ്‌സിന്റെ മൂന്ന് യൂണിറ്റുകൾ സ്ഥലത്തെത്തി. മണിക്കൂറുകളോളം നടത്തിയ പരിശ്രമത്തിനൊടുവിൽ അഗ്നിശമന സേന തീയണച്ചു.

തീപിടിത്തം നടന്ന ഭാഗം രോഗികളെ പ്രവേശിപ്പിക്കാത്ത എയർ കണ്ടീഷണർ (എസി) പ്ലാന്റ് സ്ഥിതി ചെയ്യുന്ന സ്ഥലമാണെന്ന് ആശുപത്രി അധികൃതർ സ്ഥിരീകരിച്ചു. അതിനാൽ രോഗികളെയോ ജീവനക്കാരെയോ അപകടം ബാധിച്ചിട്ടില്ല.

സംഭവസമയത്ത് ആശുപത്രിയിൽ ഉണ്ടായിരുന്ന രോഗികളെയും കൂട്ടിരിപ്പുകാരെയും സുരക്ഷിതമായി മറ്റ് ബ്ലോക്കുകളിലേക്ക് മാറ്റി. ഷോർട്ട് സർക്യൂട്ടാണ് തീപിടിത്തത്തിന് പിന്നിലെന്നാണ് പ്രാഥമിക നിഗമനം. സംഭവത്തെക്കുറിച്ച് കൂടുതൽ അന്വേഷണം ആരംഭിച്ചിട്ടുണ്ട്.