ചീഫ് ജസ്റ്റിസിനു നേരെയുള്ള അതിക്രമം ; ചീറ്റിയത് സംഘപരിവാർ 
നട്ടുവളർത്തിയ 
വിദ്വേഷവിഷം : മുഖ്യമന്ത്രി

തിരുവനന്തപുരം

ചീഫ് ജസ്റ്റിസ് ബി ആര്‍ ഗവായ്‌ക്കുനേരെ കോടതി മുറിയിൽ നടന്ന അക്രമത്തെ അപലപിച്ച്‌ മുഖ്യമന്ത്രി പിണറായി വിജയൻ. സംഘപരിവാർ നട്ടുവളർത്തിയ വിദ്വേഷത്തിന്റെ വിഷമാണ് സുപ്രീംകോടതിയിൽ ചീഫ് ജസ്റ്റിസിന് നേരെ ചീറ്റിയത്. സനാതന ധർമ്മത്തിനെതിരെ പ്രവർത്തിക്കുന്നു എന്നാരോപിച്ചാണ് അഭിഭാഷക വേഷധാരി ഷൂ എറിയാനാഞ്ഞത് എന്നാണ് റിപ്പോർട്ട്.

നിലതെറ്റിയ വ്യക്തിയുടെ വികാരപ്രകടനമായി അതിക്രമത്തെ ചുരുക്കാനാകില്ല. സംഘപരിവാറിന്റെ വിഷലിപ്തമായ വർഗീയ പ്രചാരണമാണ് അപകടകരമായ മാനസിക നിലയിലേക്ക് വ്യക്തികളെ കൊണ്ടെത്തിക്കുന്നത്. വെറുപ്പും അപരവിദ്വേഷവും ജനിപ്പിക്കുന്ന പ്രത്യയശാസ്ത്രത്തിന്റെ ഉൽപ്പന്നങ്ങളാണ് ഇത്തരം കടന്നാക്രമണങ്ങൾ. ആർഎസ്എസും അതിന്റെ പരിവാരവും നൂറു വർഷംകൊണ്ട് സൃഷ്ടിച്ച അസഹിഷ്ണുതയാണ് ഇതിന്റെ ഇന്ധനമെന്നും മുഖ്യമന്ത്രി പ്രസ്‌താവനയിൽ പറഞ്ഞു.