വയനാട് ജില്ലാ കലക്ടറുടെ പേരിൽ വാട്സാപ്പിലൂടെ പണം തട്ടാൻ ശ്രമം

കപ്പൽറ്റ: വയനാട് ജില്ലാ കലക്ടറുടെ പേരിൽ വാട്സാപ്പിലൂടെ തട്ടിപ്പ്. ജില്ലാ കളക്ടറുടെ ചിത്രം പ്രൊഫൈലാക്കിയ വാട്ട്സാപ്പ് നമ്പറിൽ നിന്നും പണം ആവശ്യപ്പെട്ട് പലർക്കും സന്ദേശങ്ങൾ ലഭിച്ചതായാണ് വിവരം. എന്നാൽ ഈ അക്കൗണ്ട് തന്റെതല്ലെന്നും പണം നൽകി ആരും വഞ്ചിതരാകരുതെന്നും വയനാട് കലക്ടർ ഡി ആർ മേഖശ്രീ പറഞ്ഞു. വയനാട് കലക്ടറുടെ ഔദ്യോ​ഗിക സോഷ്യൽ മീഡിയ അക്കൗണ്ടുകളിൽ ഇത്തരം വ്യാജ സന്ദേശങ്ങളുടെ ചിത്രം ഉൾപ്പെടെ പങ്കുവച്ചിട്ടുണ്ട്.

എനിക്ക് വേണ്ടി ഒരു സഹായം ചെയ്യണം. എനിക്ക് അത്യാവശ്യമായി ഒരു മീറ്റിങ്ങിൽ പങ്കെടുക്കേണ്ടതുണ്ട്. വേണ്ടപ്പെട്ട ഒരാൾക്ക് നിങ്ങൾക്ക് കുറച്ച് പണം അയച്ച് നൽകാമോ - എന്ന് ചോദിച്ചാണ് തട്ടിപ്പുകാർ സമീപിക്കുന്നത്. തുടർന്ന് പണം അയക്കാനുള്ള ​ഗൂ​ഗിൽ പേ നമ്പരും അക്കൗണ്ട് ഹോൾഡറിന്റെ വിവരങ്ങളും അയച്ച് നൽകും. പണം അയച്ചതിന്റെ സ്ക്രീൻ ഷോട്ട് അയക്കണമെന്നും വൈകുന്നേരത്തിന് മുമ്പ് തിരിച്ചു നൽകുമെന്നുമാണ് തട്ടിപ്പുകാർ പറയുക. പൊതുജനം ഇത്തരം തട്ടിപ്പുകൾക്കെതിരെ ബോധവാൻമാരായിരിക്കണമെന്നും വഞ്ചിതരാകരുതെന്നും കലക്ടർ മുന്നറിയിപ്പ് നൽകി.