print edition 'എവിടെ യുഡിഎഫേ ആ 21,000 രൂപ’

തിരുവനന്തപുരം

സെക്രട്ടറിയറ്റിനുമുന്നിൽ ആശമാരുടെ പേരിൽ ഏതാനും എസ്‌യുസിഐക്കാർ ബിജെപി പിന്തുണയോടെ ആരംഭിച്ച സമരത്തിന്‌ ആവേശം നൽകാൻ എത്തിയ യുഡിഎഫ്‌ നേതാക്കൾ പ്രസംഗിച്ചത്‌ ‘സമരത്തിലെ ആവശ്യങ്ങൾ യുഡിഎഫ്‌ നടപ്പാക്കും’ എന്നായിരുന്നു. ആവശ്യങ്ങളിൽ പ്രധാനം സംസ്ഥാന സർക്കാർ നൽകുന്ന പ്രതിമാസ ഓണറേറിയം 21,000 രൂപയാക്കണമെന്നായിരുന്നു.

ആവശ്യങ്ങളെല്ലാം നടപ്പാക്കും എന്ന്‌ പ്രതിപക്ഷ നേതാവുൾപ്പെടെ പറഞ്ഞതുകേട്ടു വിശ്വസിച്ച എസ്‌യുസിഐക്കാർ എണ്ണത്തിൽ കുറവാണെങ്കിലും മുഴുവൻ വീടുകളിലും കയറിയിറങ്ങി യുഡിഎഫിന്‌ വോട്ട്‌ പിടിക്കും എന്ന്‌ പ്രഖ്യാപിച്ചു. എന്നാൽ അവർ ഇറങ്ങുംമുമ്പ്‌ യുഡിഎഫിന്റെ പ്രകടനപത്രികയിറങ്ങി. 21,000 രൂപ പറഞ്ഞവരുടെ ഇപ്പോഴത്തെ വാഗ്‌ദാനം രണ്ടായിരം രൂപ പ്രത്യേക അലവൻസ്‌ നൽകുമെന്നാണ്‌. വിരമിക്കൽ ആനുകൂല്യമായി അഞ്ച്‌ ലക്ഷം വേണമെന്ന ആവശ്യവും ഇല്ല.

കേന്ദ്ര പദ്ധതിയാണ്‌ ആശ എങ്കിലും രാജ്യത്ത്‌ ഏറ്റവും ഉയർന്ന ഓണറേറിയം നൽകുന്ന സംസ്ഥാനമാണ്‌ കേരളം. കോൺഗ്രസ്‌ ഭരണത്തിലുള്ള സംസ്ഥാനങ്ങളിലെല്ലാം അയ്യായിരത്തിൽ താഴെയാണ്‌. കേരളത്തിൽ 8000 രൂപയാണ്‌ ഇ‍ൗ നവംബർമുതൽ നൽകുന്നത്‌. പുറമേ അലവൻസുകളുമുണ്ട്‌. ആശമാർക്കൊപ്പം നിൽക്കുന്ന സർക്കാരിനെതിരെ സമരനാടകവുമായി ഏതാനും എസ്‌യുസിഐക്കാർ ഇറങ്ങിത്തിരിച്ചപ്പോൾ, മാധ്യമങ്ങളെ ഉപയോഗിച്ച്‌ രാഷ്‌ട്രീയനേട്ടമുണ്ടാക്കാനാണ്‌ ദിവസവും സമരപ്പന്തൽ സന്ദർശിച്ച്‌, പൊള്ളയായ വാഗ്‌ദാനം നൽകിയതെന്ന്‌ വീണ്ടും വ്യക്തമാവുകയാണ്‌.