അങ്കമാലിയിൽ വ്യാപാരസ്ഥാപനത്തില്‍ വൻ അഗ്നിബാധ; തീ അണയ്ക്കാൻ ശ്രമം തുടരുന്നു

കൊച്ചി: ഓണത്തിരക്കിനിടെ അങ്കമാലിയിൽ വ്യാപാര സ്ഥാപനത്തിൽ വൻ തീപിടിത്തം. റെയിൽവേ സ്റ്റേഷന് സമീപം പ്രവർത്തിക്കുന്ന ‘ബാബു ട്രേഡ് ലിങ്ക്സ്’ എന്ന ഹോൾസെയിൽ സ്ഥാപനത്തിലാണ് വൈകുന്നേരത്തോടെ തീപിടിത്തമുണ്ടായത്. തീയും കനത്ത പുകയും ഉയർന്നതോടെ പ്രദേശത്ത് പരിഭ്രാന്തി പടർന്നു.

തീപിടിത്തമുണ്ടാകുമ്പോൾ ജീവനക്കാരും സാധനങ്ങൾ വാങ്ങാനെത്തിയ ഉപഭോക്താക്കളും ഉൾപ്പെടെ നിരവധി പേർ സ്ഥാപനത്തിലുണ്ടായിരുന്നു. തീ ആളിപ്പടരുന്നത് ശ്രദ്ധയിൽപ്പെട്ടതോടെ ഇവർ വേഗത്തിൽ പുറത്തേക്ക് ഇറങ്ങിയതിനാൽ വലിയ ദുരന്തം ഒഴിവായി. നിലവിൽ ആളപായമൊന്നും റിപ്പോർട്ട് ചെയ്തിട്ടില്ല.

പ്ലാസ്റ്റിക് ഉൾപ്പെടെയുള്ള വസ്തുക്കൾ വലിയ തോതിൽ സൂക്ഷിച്ചിരുന്ന സ്ഥാപനമായതിനാൽ തീ അതിവേഗം പടർന്നതായാണ് വിവരം. തീപിടിത്തത്തിന്റെ കാരണം ഇതുവരെ വ്യക്തമായിട്ടില്ല.

വിവരമറിഞ്ഞ് അങ്കമാലി ഫയർ സ്റ്റേഷനിൽനിന്നുള്ള നാല് യൂണിറ്റ് ഫയർഫോഴ്സ് സ്ഥലത്തെത്തി.

തീ നിയന്ത്രണവിധേയമാക്കാനുള്ള ശ്രമം ശക്തമായി തുടരുകയാണ്. തീയുടെ വ്യാപ്തി കണക്കിലെടുത്ത് കൂടുതൽ ഫയർ യൂണിറ്റുകളുടെ സഹായവും ആവശ്യപ്പെട്ടിട്ടുണ്ട്.

അങ്കമാലിയിലെ തിരക്കേറിയ വ്യാപാരമേഖലയിലാണ് സംഭവം നടന്നത്. ഓണത്തോടനുബന്ധിച്ച് ഉത്രാടപ്പാച്ചിലിന്റെ ഭാഗമായി വലിയ ജനത്തിരക്കുള്ള സമയമായതിനാൽ പൊലീസ്, ഫയർഫോഴ്സ് സംഘങ്ങൾ സ്ഥലത്ത് സുരക്ഷാ ക്രമീകരണങ്ങൾ ശക്തമാക്കി. സമീപത്തുണ്ടായിരുന്ന ആളുകളെ സുരക്ഷിത സ്ഥാനങ്ങളിലേക്ക് മാറ്റുകയും തീപിടിത്തം കൂടുതൽ ഭാഗങ്ങളിലേക്ക് വ്യാപിക്കാതിരിക്കാനുള്ള നടപടികൾ സ്വീകരിക്കുകയും ചെയ്തു.