ഷൂ ധരിച്ചെത്തിയതിന് ക്രൂരമർദനം; കാസർകോട് സ്കൂളിലെ റാ​ഗിങ്ങിൽ 14 വിദ്യാർഥികൾക്കെതിരെ കേസ്

കാസർകോട്: കാസർകോട് സ്കൂളിൽ വീണ്ടും റാ​ഗിങ്. ഉപ്പളയിലെ ബേക്കൂർ ഹയർ സെക്കൻഡറി സ്കൂളിലാണ് റാ​ഗിങ് പരാതി ഉയർന്നത്. സ്കൂളിൽ ഷൂ ധരിച്ചതിനും ഷർട്ടിന്റെ ആദ്യ ബട്ടൺ തുറന്നിട്ടുവെന്നും ആരോപിച്ച് പ്ലസ് വൺ വിദ്യാർഥികളെ സീനിയർ വിദ്യാർഥികളായ സംഘം ചേർന്ന് അതിക്രൂരമായി മർദിക്കുകയായിരുന്നു.

ഉച്ചകഴിഞ്ഞ് സ്കൂളിലേയ്ക്ക് കയറുമ്പോൾ പടിക്കെട്ടിന് സമീപത്തുവെച്ച് സീനിയർ വിദ്യാർഥികൾ തടഞ്ഞുനിർത്തുകയും മർദിക്കുകയുമായിരുന്നുവെന്ന് വി​ദ്യാർഥി പറയുന്നു. കൈകൾ പിന്നിലേക്ക് ഒടിക്കുകയും കവിളത്തടിക്കുകയും ഷൂ ധരിച്ച കാലുകൊണ്ട് ചവിട്ടുകയും ചെയ്തതായി കുട്ടി വെളിപ്പെടുത്തി. സംഭവത്തിൽ പ്ലസ് ടു വിദ്യാർഥികളായ 14 പേർക്കെതിരെ പൊലീസ് കേസെടുത്തു. നാല് വിദ്യാർഥികളെ സ്കൂൾ മാനേജ്മെന്റ് സസ്പെൻഡ് ചെയ്തു.

മുൻപും സ്കൂളിൽ റാ​ഗിങ് പരാതി ഉയർന്നിരുന്നു. പലതവണ വിദ്യാർഥികൾക്കെതിരെ സ്കൂൾ മാനേജ്മെന്റ് അച്ചടക്ക നടപടികൾ സ്വീകരിച്ചിട്ടുണ്ടെങ്കിലും സമാന സംഭവങ്ങൾ ഉയരുന്നത് ആശങ്കയ്ക്ക് വഴിവെച്ചു. സ്കൂൾ പ്രിൻസിപ്പൽ നൽകിയ പരാതിയുടെ അടിസ്ഥാനത്തിൽ മഞ്ചേശ്വരം പോലീസ് കേസെടുത്ത് അന്വേഷണം ആരംഭിച്ചു.