പൊതു വിദ്യാലയങ്ങളിൽ ഹൈടെക് കുതിപ്പ്; ഹൈസ്‌കൂളുകളിൽ അഡ്വാൻസ്ഡ് റോബോട്ടിക് കിറ്റുകൾ ഫെബ്രുവരിയിൽ: മന്ത്രി

തിരുവനന്തപുരം: പൊതുവിദ്യാലയങ്ങളിൽ റോബോട്ടിക്‌സ് പഠനം കൂടുതൽ കാര്യക്ഷമമാക്കുന്നതിന്റെ ഭാഗമായി മുഴുവൻ ഹൈസ്‌കൂളുകളിലേക്കും കൈറ്റ് വഴി അഡ്വാൻസ്ഡ് റോബോട്ടിക് കിറ്റുകൾ ലഭ്യമാക്കുമെന്ന് മന്ത്രി വി ശിവൻകുട്ടി പറഞ്ഞു. ഫെബ്രുവരി മാസത്തിൽ 2,500 അഡ്വാൻസ്ഡ് കിറ്റുകളാണ് സ്‌കൂളുകളിലെ ലിറ്റിൽ കൈറ്റ്‌സ് യൂണിറ്റുകൾ വഴി വിന്യസിക്കുക.

സംസ്ഥാനത്തെ സ്‌കൂളുകളിൽ നേരത്തെ തന്നെ 29,000 റോബോട്ടിക് കിറ്റുകൾ കൈറ്റ് ലഭ്യമാക്കിയിരുന്നു. ഈ അധ്യയനവർഷം മുതൽ പത്താം ക്ലാസിലെ ഐസിടി പാഠ്യപദ്ധതിയുടെ ഭാഗമായി റോബോട്ടിക്‌സ് പഠനം ഉൾപ്പെടുത്തിയതോടെ 4 ലക്ഷത്തിലധികം വിദ്യാർഥികൾക്ക് ഇതിന്റെ പ്രയോജനം ലഭിക്കുന്നുണ്ട്. ഇതിന്റെ തുടർച്ചയായാണ് ഇന്റർനെറ്റ് ഓഫ് തിങ്ക്‌സ് (ഐഒടി) അധിഷ്ഠിത ഉപകരണങ്ങൾ നിർമ്മിക്കാൻ സഹായിക്കുന്ന പുതിയ കിറ്റുകൾ നൽകുന്നത്.

പുതിയ കിറ്റിലെ സവിശേഷതകൾ

നിലവിലുള്ള കിറ്റുകളിൽ നിന്നും വ്യത്യസ്തമായി കൂടുതൽ നൂതനമായ സാങ്കേതികവിദ്യയാണ് അഡ്വാൻസ്ഡ് കിറ്റുകളിൽ ഉൾപ്പെടുത്തിയിരിക്കുന്നത്

കണക്ടിവിറ്റി: ഐഒടി സംവിധാനങ്ങൾ പ്രവർത്തിപ്പിക്കാൻ ആവശ്യമായ വൈഫൈ, ബ്ലൂടൂത്ത് സൗകര്യങ്ങളുള്ള ഇഎസ്പി - തേർട്ടി റ്റു ഡെവലപ്‌മെന്റ് ബോർഡാണ് ഇതിന്റെ പ്രധാന ഭാഗം.

സെൻസറുകൾ: അൾട്രാസോണിക് ഡിസ്റ്റൻസ്, സോയിൽ മോയിസ്ചർ, പിഐആർ മോഷൻ, ലൈൻ ട്രാക്കിംഗ് തുടങ്ങി വിവിധതരം സെൻസറുകൾ.

ഹാർഡ്വയർ: റോബോട്ടിക് വാഹനങ്ങൾ നിർമ്മിക്കാൻ ഫോർ ഡബ്ലിയു ഡി സ്മാർട്ട് കാർ ഷാസി കിറ്റ്, സബ്‌മെഴ്‌സിബിൾ മിനി വാട്ടർ പമ്പ്, റീച്ചാർജ് ചെയ്യാവുന്ന ലിഥിയം-അയൺ ബാറ്ററി പാക്ക്.

പഠനനേട്ടങ്ങൾ

ഈ കിറ്റുകൾ ഉപയോഗിക്കുന്നതിലൂടെ കേവലം പാഠപുസ്തക അറിവുകൾക്കപ്പുറം പ്രായോഗികമായ നിരവധി പ്രോജക്റ്റുകൾ ചെയ്യാൻ കുട്ടികൾ പ്രാപ്തരാകും. പ്രത്യേക പാത പിന്തുടരുന്ന റോബോട്ടുകൾ, ചെടികൾക്ക് ഓട്ടോമാറ്റിക്കായി വെള്ളം ഒഴിക്കാനുള്ള സ്മാർട്ട് ഇറിഗേഷൻ സിസ്റ്റം, ചലനം തിരിച്ചറിഞ്ഞ് പ്രവർത്തിക്കുന്ന സുരക്ഷാ സംവിധാനങ്ങൾ, കാഴ്ച പരിമിതർക്ക് നടക്കാൻ സഹായിക്കുന്ന 'സ്മാർട്ട്' വടികൾ, സ്മാർട്ട് വെതർ സ്റ്റേഷനുകൾ, വായു ഗുണനിലവാര പരിശോധനാ സംവിധാനങ്ങൾ, സ്മാർട്ട് എനർജി സേവിംഗ് ഡിവൈസുകൾ, ഇലക്ട്രോണിക് സർക്യൂട്ടുകളെക്കുറിച്ച് ആഴത്തിൽ പഠിക്കാനും, അവയിലെ പ്രശ്‌നങ്ങൾ സ്വയം കണ്ടെത്തി പരിഹരിക്കാനും വിദ്യാർത്ഥികൾക്ക് ഇതിലൂടെ സാധിക്കും. കൂടാതെ ബ്ലോക്ക് കോഡിങ്, പൈത്തൺ, സി തുടങ്ങിയ പ്രോഗ്രാമിങ് ഭാഷകളിൽ നൈപുണ്യം നേടാനും അഡ്വാൻസ്ഡ് കിറ്റുകൾ അവസരമൊരുക്കും.