തിരുവനന്തപുരത്ത്‌ കഞ്ചാവ്‌ കേസിലെ പ്രതി എസ്‌ഐയെ കുത്തിപരിക്കേൽപ്പിച്ചു

തിരുവനന്തപുരം: പിടികൂടുന്നതിനിടെ കഞ്ചാവ്‌ കേസിലെ പ്രതി പൂജപ്പുര സ്‌റ്റേഷനിലെ എസ്‌ഐയെ കുത്തി. സുധീഷിനാണ്‌ കുത്തേറ്റത്‌. ശ്രീജിത്ത് ഉണ്ണി എന്നയാളാണ് ആക്രമിച്ചത്. എസ്ഐയെ കുത്തിയ ശേഷം പ്രതി ഓടി രക്ഷപ്പെട്ടു.

വ്യാഴം രാത്രിയാണ് സംഭവം. കല്ലറമടം ക്ഷേത്രത്തിന് സമീപം ചിലർ മദ്യപിച്ച് ബഹളംവയ്‌ക്കുന്നതായി വിവരം ലഭിച്ചതിനെ തുടർന്നാണ് പൊലീസ് എത്തിയത്. കഞ്ചാവ് ഉൾപ്പടെയുള്ള ലഹരി വസ്തുക്കൾ കണ്ടെടുക്കുകയും ചെയ്തു. ഇതിന് പിന്നാലെയാണ് പ്രതി പൊലീസിന് നേരെ തിരിഞ്ഞത്. അരയിൽ കരുതിയിരുന്ന കത്തിയെടുത്ത് വീശുകയായിരുന്നു. തടയുന്നതിനിടെ എസ്‌ഐയുടെ കയ്യിൽ പരിക്കേൽക്കുകയായിരുന്നു.

കാപ്പ കേസ് പ്രതിയായ ശ്രീജിത്ത് ഉണ്ണി മൂന്ന് ദിവസം മുൻപാണ് ജയിലിൽ നിന്ന് ഇറങ്ങിയത്.