പരിശോധനയ്‌ക്കിടെ 10 കിലോ കഞ്ചാവ്‌ ഉപേക്ഷിച്ച്‌ കടന്നു; പ്രതികൾ അറസ്റ്റിൽ

പാറശാല : പരിശോധനയ്‌ക്കിടെ കഞ്ചാവ് ഉപേക്ഷിച്ച് കടന്ന പ്രതികളെ പാറശാല പൊലീസ് അറസ്റ്റ് ചെയ്തു. വെള്ളറട കാക്കതൂക്കി സുരേഷ് ഭവനിൽ സുരേഷ് (29), കാക്കതൂക്കി അർച്ചനയിൽ അരുൺ (41, വിഷ്ണു) എന്നിവരെയാണ് അറസ്റ്റ് ചെയ്തത്. ബുധൻ രാവിലെ​ നെടിയാങ്കോടിന് സമീപത്താണ്‌ സംഭവം. കാറിൽ കടത്താൻ ശ്രമിച്ച 10 കിലോ കഞ്ചാവാണ് ഡാൻസാഫ് സംഘത്തിന്റെ പരിശോധനയ്‌ക്കിടെ പ്രതികൾ ഉപേക്ഷിച്ച്‌ രക്ഷപ്പെട്ടത്.

​കാരക്കോണം ഭാഗത്തുനിന്ന് കാറിൽ കഞ്ചാവ് കടത്തുന്നുണ്ടെന്ന വിവരത്തിന്റെ അടിസ്ഥാനത്തിൽ പൊലീസ് പരിശോധന ശക്തമാക്കിയിരുന്നു. എന്നാൽ പൊലീസിനെ വെട്ടിച്ച് കഞ്ചാവ് പൊതി പ്രതികൾ വഴിയിൽ ഉപേക്ഷിച്ച്‌ കാറുമായി കടന്നുകളയുകയായിരുന്നു. കഞ്ചാവ് പൊലീസ് കസ്റ്റഡിയിലെടുത്തു. തുടർന്ന് നടത്തിയ അന്വേഷണത്തിലാണ് ഇരുവരും പിടിയിലായത്.

​