സ്പേസ് എക്സിന്റെയും നാസയുടെയും പേരിൽ തട്ടിപ്പ്: ഹരിപ്പാടുകാരനില്‍ നിന്ന് 75 ലക്ഷം തട്ടി

ഹരിപ്പാട്‌: ഇറിഡിയം വാഗ്ദാനംചെയ്ത്‌ 75 ലക്ഷം തട്ടിയതായി പരാതി. ഇലോൺ മസ്കിന്റെ സ്പേസ് എക്സ് ഏജൻസിയുടെയും അമേരിക്കൻ ബഹിരാകാശ ഏജൻസി നാസയുടെയും പേരുപയോഗിച്ചാണ്‌ തട്ടിപ്പ്. ‘അൾട്രാ സ്പേസ് എക്സ്' എന്ന പേരിലുള്ള ഏജൻസി വഴി ഇറിഡിയം വാങ്ങി നൽകാമെന്ന്‌ പറഞ്ഞാണ്‌ ഹരിപ്പാട്ടുകാരനിൽനിന്ന് പണം വാങ്ങിയത്. ജില്ലാ പൊലീസ് മേധാവിക്ക്‌ ലഭിച്ച പരാതിയെത്തുടർന്ന് ഹരിപ്പാട് പൊലീസ്‌ അന്വേഷണം തുടങ്ങി.

ഇറിഡിയം കച്ചവടത്തിൽ പങ്കാളിയാക്കാമെന്ന്‌ പറഞ്ഞ് പരിചയക്കാരനായ നാട്ടുകാരനാണ് ഹരിപ്പാട് സ്വദേശിയെ ആദ്യംസമീപിച്ചത്. വിശ്വാസ്യത ഉറപ്പാക്കാൻ ഇയാൾ ഇതേ ബിസിനസ് ചെയ്യുന്നവരെന്ന്‌ പറഞ്ഞ് കൊല്ലത്തെ പെട്രോൾ പമ്പുടമയെയും തിരുവനന്തപുരം ഊരൂട്ടമ്പലം സ്വദേശിനിയെയും പരിചയപ്പെടുത്തി. തുടർന്നാണ്‌ എട്ട്‌ ലക്ഷം രൂപ കെമാറിയത്‌. പിന്നീട് പലതവണയായി 75 ലക്ഷം രൂപ നൽകി. ഇറിഡിയം കിട്ടാതായപ്പോൾ പരാതിക്കാരൻ പണം വാങ്ങിയവരുടെ വീടുകളിലും സ്ഥാപനങ്ങളിലുംചെന്ന് ബഹളംവച്ചു. തുടർന്ന്‌ ഒക്ടോബർ 20-ന്‌ പണം നൽകാമെന്നായിരുന്നു തട്ടിപ്പുകാരുടെ വാഗ്ദാനം.

പിന്നീട്‌ 18 ലക്ഷത്തിന്റെയും 10 ലക്ഷത്തിന്റെയും ചെക്കുകൾ പരാതിക്കാരന്‌ നൽകിയെങ്കിലും പണമില്ലാത്തതിനാൽ മടങ്ങി. അമേരിക്കയിൽനിന്ന് ഇറിഡിയം നൽകുന്നതിനുള്ള നാസ അൾട്രാ എക്സ് ഏജൻസിയുടെ പേരിലുള്ള കത്ത്, ഇറിഡിയത്തിന്റെയും ഇതു തിരിച്ചറിയാനുള്ള ഉപകരണത്തിന്റെയും ചിത്രം എന്നിവ ഹരിപ്പാട് സ്വദേശിക്കു നൽകിയിരുന്നു. ഇവ പൊലീസിന്‌ കൈമാറി.