print edition മായില്ല; ആ സ്നേഹസ്പർശം

കോഴിക്കോട്: രോഗങ്ങളുടെ ദുരിതച്ചുഴിയിൽ ഒറ്റപ്പെടുന്നവർക്ക് തണലേകിയ സ്നേഹസ്പർശമായിരുന്നു കാനത്തിൽ ജമീല. നാടിന്റെ അടിസ്ഥാനസ‍ൗകര്യ വികസനം മാത്രമല്ല, സാധാരണക്കാരുടെ ക്ഷേമവും ആരോഗ്യവും അവരുടെ മുഖ്യപരിഗണനയായിരുന്നു. അങ്ങനെയാണ് ജില്ലാ പഞ്ചായത്ത് പ്രസിഡന്റായ ആദ്യഘട്ടത്തിൽ വൃക്കരോഗികൾക്കായി ‘സ്നേഹസ്പർശം’ പദ്ധതി തുടങ്ങിയത്‌. ഇത്‌ സംസ്ഥാനത്തിനുതന്നെ മാതൃകയായി. രണ്ടാംഘട്ടത്തിൽ 2020ൽ വീണ്ടും അതേ ചുമതലയിലെത്തിയപ്പോൾ ‘സ്നേഹസ്പർശ’ത്തിന്റെ ഭാഗമായി വൃക്കമാറ്റിവയ്‌ക്കാൻ ധനസഹായം നൽകുന്ന ‘ജീവജ്യോതി’ പദ്ധതിക്കും തുടക്കമിട്ടു.

വൃക്കരോഗബാധിതരായി ഒട്ടേറെ പേർ ദുരിതജീവിതം നയിക്കുന്നത്‌ ശ്രദ്ധയിൽപ്പെട്ടതോടെയാണ് ഡയാലിസിസിന് ധനസഹായം നൽകാൻ കാനത്തിൽ ജമീലയുടെ നേതൃത്വത്തിൽ ‘സ്നേഹസ്പർശം’ ആരംഭിക്കുന്നത്. അവരുടെ ഇച്ഛാശക്തിയും നേതൃപാടവവുംകൊണ്ടുമാത്രമാണ് പദ്ധതി വിജയകരമായി മുന്നോട്ടുപോയത്‌. ആരോഗ്യമേഖലയിൽ ജില്ലാ പഞ്ചായത്തിന്‌ ലഭിച്ച സംസ്ഥാന സർക്കാർ പുരസ്കാരങ്ങളിലെല്ലാം നിർണായകമായത് ‘സ്നേഹസ്പർശം’ പദ്ധതിയാണ്. മറ്റ് ജില്ലകളും പദ്ധതി ഏറ്റെടുക്കാൻ മുന്നോട്ടുവന്നു.

ആദ്യഘട്ടത്തിൽ മാസം എട്ട്‌ ഡയാലിസിസുകൾക്ക് ഓരോവ്യക്തിക്കും 250 രൂപ വീതമാണ് ജില്ലാ പഞ്ചായത്ത് നൽകിയിരുന്നത്. ജനകീയമായി ഫണ്ട് സമാഹരണവും നടത്തി. 2017മുതൽ തദ്ദേശ സ്ഥാപനങ്ങളുടെ വിഹിതവും ഇതിനായി വിനിയോഗിച്ച്‌ തുടങ്ങി. ഇതുവരെ പതിനായിരത്തിലേറെ പേർക്ക്, ഏകദേശം അഞ്ചു ലക്ഷം ഡയാലിസിസുകൾക്ക് സഹായം നൽകി. നിലവിൽ മാസം 12 ഡയാലിസിസുകൾക്ക് 330 രൂപ വീതമാണ് നൽകുന്നത്. പ്രതിസന്ധിയുണ്ടായ ഒരുഘട്ടത്തിൽ അവർ തന്നെ മുന്നിട്ടിറങ്ങി എല്ലാ തദ്ദേശ സ്ഥാപനങ്ങളിലും യോഗങ്ങൾ വിളിച്ചു. ഡയാലിസിസ് യൂണിറ്റുകളോടും കുടുംബശ്രീപോലുള്ള കൂട്ടായ്മകളോടും സംസാരിച്ചു‍. നിരന്തര പരിശ്രമം നടത്തി പദ്ധതി മുടങ്ങാതെ നോക്കി.

2020ൽ പ്രസിഡന്റായപ്പോൾ ലഭിച്ച ചുരുങ്ങിയ കാലത്തിനുള്ളിലാണ് ‘ജീവജ്യോതി’ ആരംഭിച്ചത്. ബന്ധുക്കൾ വൃക്കനൽകാൻ തയ്യാറായി ഉണ്ടായിട്ടും സാമ്പത്തികം ഇല്ലാത്തവരുടെ, മുഴുവൻ ശസ്ത്രക്രിയാ ചെലവുമാണ് ജില്ലാ പഞ്ചായത്ത് വഹിക്കുന്നത്. ഇതിനായി പ്രധാന അഞ്ച്‌ ആശുപത്രികളുമായി ജമീലതന്നെ സംസാരിച്ചു. ഇതുവരെ 120ഓളം പേർക്കാണ്‌ പൂർണമായും വൃക്കമാറ്റിവയ്‌ക്കൽ ശസ്ത്രക്രിയക്ക്‌ ധനസഹായം നൽകിയത്. സ്നേഹസമ്പന്നയായ ആ ജനപ്രതിനിധിയുടെ തണലേറ്റുവാങ്ങിയ രോഗികളുടെയും കുടുംബങ്ങളുടെയും മനസ്സിൽ മറ്റാർക്കും തോൽപ്പിക്കാനാവാത്തവിധം എന്നും മുന്നിലാണ് ജമീലയുടെ സ്ഥാനം.