സിപിഐ എം നിലമ്പൂര്‍ ഏരിയാ 
സമ്മേളനം തുടങ്ങി

നിലമ്പൂർ

സിപിഐ എം 24ാം പാർടി കോൺ​ഗ്രസിന്റെ മുന്നോടിയായുള്ള നിലമ്പൂർ ഏരിയാ സമ്മേളനത്തിന് തുടക്കം. കുഞ്ഞുട്ടി പനോലൻ–- ഇ പി ഉമ്മർ ന​ഗറിൽ (കരുളായി പിജി ഓഡിറ്റോറിയം) മുതിർന്ന പാർടി അം​ഗം പി ടി ഉമ്മർ പതാക ഉയർത്തി. പ്രതിനിധി സമ്മേളനം സംസ്ഥാന കമ്മിറ്റി അം​ഗം പി കെ സൈനബ ഉദ്ഘാടനംചെയ്തു. കെ റഹീം, അരുമ ജയകൃഷ്ണൻ, ഇ അരുൺദാസ്, പി സി നന്ദകുമാർ, മിനി സുജേഷ് എന്നിവരടങ്ങിയ പ്രസീഡിയമാണ് സമ്മേളനം നിയന്ത്രിക്കുന്നത്.

 ടി പി യൂസഫ് രക്തസാക്ഷി പ്രമേയവും കെ മോഹനൻ അനുശോചന പ്രമേയവും അവതരിപ്പിച്ചു. ഏരിയാ സെക്രട്ടറി ഇ പത്മാക്ഷൻ പ്രവർത്തന റിപ്പോർട്ട് അവതരിപ്പിച്ചു. 

സ്വാ​ഗതസംഘം ചെയർമാൻ ഷാജി മൻഹർ സ്വാ​ഗതം പറഞ്ഞു.  ജില്ലാ സെക്രട്ടറി ഇ എൻ മോഹൻദാസ്‌, ജില്ലാ സെക്രട്ടറിയറ്റ് അം​ഗങ്ങളായ വി ശശികുമാർ, വി എം ഷൗക്കത്ത്, ജില്ലാ കമ്മിറ്റി അം​ഗം ജോർജ് കെ ആന്റണി എന്നിവർ സമ്മേളനത്തിൽ പങ്കെടുക്കുന്നുണ്ട്. 

റിപ്പോർട്ടിന്മേൽ പൊതുചർച്ച ആരംഭിച്ചു. വെള്ളിയാഴ്ച ചർച്ചക്കുള്ള മറുപടി, പുതിയ ഏരിയാ കമ്മിറ്റി തെരഞ്ഞെടുപ്പ്, ജില്ലാ സമ്മേളന പ്രതിനിധികളെ തെരഞ്ഞെടുക്കൽ, ക്രഡൻഷ്യൽ റിപ്പോർട്ട് അവതരണം, പ്രമേയാവതരണം എന്നിവ നടക്കും.