സിപിഐ എം പയ്യോളി ഏരിയാ സമ്മേളനത്തിന് പതാക ഉയർന്നു

പയ്യോളി

സിപിഐ എം പയ്യോളി ഏരിയാ സമ്മേളനത്തിന് പതാക ഉയർന്നു. നന്തിയിലെ പൊതുസമ്മേളന നഗരിയായ സീതാറാം യെച്ചൂരി നഗറിൽ സ്വാഗതസംഘം ചെയർമാൻ കെ ജീവാനന്ദൻ പതാക ഉയർത്തി. നന്തി ലോക്കൽ സെക്രട്ടറി വി വി സുരേഷ് അധ്യക്ഷനായി. സ്വാഗതസംഘം കൺവീനർ എ കെ ഷൈജു സ്വാഗതം പറഞ്ഞു. 

പതാകജാഥ മുചുകുന്നിലെ അനന്തൻ നായരുടെ സ്മൃതിമണ്ഡപത്തിൽ ജില്ലാ കമ്മിറ്റി അംഗം കാനത്തിൽ ജമീല എംഎൽഎ ഉദ്ഘാടനംചെയ്തു. അനന്തൻ നായരുടെ ഭാര്യ വിജയലക്ഷ്മിയിൽനിന്ന്‌ ജാഥാ ലീഡർ ഏരിയാ കമ്മിറ്റി അംഗം ടി ചന്തു പതാക ഏറ്റുവാങ്ങി. കൊടിമര ജാഥ മൂരാട് പി ഗോപാലൻ സ്മൃതിമണ്ഡപത്തിൽ ജില്ലാ കമ്മിറ്റി അംഗം ഡി ദീപ ഉദ്ഘാടനംചെയ്തു. പി ഗോപാലന്റെ ഭാര്യ മാലതിയിൽനിന്ന് ജാഥാ ലീഡർ ഏരിയാ കമ്മിറ്റി അംഗം പി എം വേണുഗോപാലൻ ഏറ്റുവാങ്ങി. ദീപശിഖാജാഥ തുറയൂരിലെ രക്തസാക്ഷി പി ടി അമ്മത് മാസ്റ്ററുടെ സ്മൃതിമണ്ഡപത്തിൽ ഏരിയാ സെക്രട്ടറി എം പി ഷിബു ഉദ്ഘാടനംചെയ്തു. രക്തസാക്ഷി പി ടി അമ്മത് മാസ്റ്ററുടെ മകൻ പി ടി റസാക്കിൽനിന്ന്‌ ജാഥാ ലീഡർ ഏരിയാ കമ്മിറ്റി അംഗം വി ഹമീദ് ദീപശിഖ ഏറ്റുവാങ്ങി അത്‌ലറ്റുകൾക്ക് കൈമാറി. മൂന്ന് ജാഥകളും വൈകിട്ട് 5.30 ഓടെ നന്തി ടൗണിൽ സംഗമിച്ചു. പതാകയും കൊടിമരവും ദീപശിഖയും കെ ജീവാനന്ദൻ, സി കെ ശ്രീകുമാർ, സുരേഷ് ചങ്ങാടത്ത് എന്നിവർ ഏറ്റുവാങ്ങി. ചുവപ്പുസേനയുടെ അകമ്പടിയോടെയാണ് ജാഥ സമ്മേളനനഗരിയിൽ എത്തിച്ചേർന്നത്. ഏരിയാ സെക്രട്ടറി എം പി ഷിബു, കാനത്തിൽ ജമീല എംഎൽഎ, ഡി ദീപ, ടി ചന്തു, പി എം വേണുഗോപാലൻ,  വി ഹമീദ് എന്നിവർ സംസാരിച്ചു. പ്രതിനിധി സമ്മേളനം ശനി രാവിലെ ഒമ്പതിന് നന്തി വീരവഞ്ചേരിയിൽ പ്രത്യേകം സജ്ജമാക്കിയ പി ഗോപാലൻ, ഒ കെ പി കുഞ്ഞിക്കണ്ണൻ നഗറിൽ സംസ്ഥാന സെക്രട്ടറിയറ്റ്‌ അംഗം ടി പി രാമകൃഷ്ണൻ എംഎൽഎ ഉദ്ഘാടനം ചെയ്യും. ഞായറാഴ്ച നടക്കുന്ന പൊതുസമ്മേളനം കേന്ദ്ര കമ്മിറ്റി അംഗം എളമരം കരീം ഉദ്ഘാടനം ചെയ്യും.