കേമൻ മില്ലറ്റ്‌, അടിപതറാതെ റോയൽ ഐസിങ്‌
സ്വന്തം ലേഖിക
ആലപ്പുഴ
അയ്യോ, കേക്കോ, ഇതിലെത്ര കാർബോഹൈഡ്രേറ്റുണ്ട്‌? ഒരു കഷ്‌ണം കേക്ക്‌ വായിലേക്ക്‌ വയ്ക്കും മുൻപേ മലയാളികളുടെ ചോദ്യമിതാണ്‌. ഭക്ഷണരീതി മാറ്റുന്ന കേരളീയർക്ക്‌ മുൻപിൽ തന്റെ തനിസ്വരൂപം അടിമുടി മാറ്റിയാണ്‌ ക്രിസ്‌മസ്‌ കേക്കുകൾ ഇക്കുറി എത്തുന്നത്‌. ക്രിസ്‌മസ്‌ വിപണിയ്ക്ക്‌ എന്നും പ്രിയപ്പെട്ടത്‌ പ്ലം കേക്ക്‌ ആണെന്നിരിക്കിലും പരീക്ഷണങ്ങൾ നടത്തിയാൽ അത്‌ വിജയിപ്പിക്കാൻ മലയാളികൾ റെഡിയാണ്‌.
ഇത്‌ 40 പ്ലസ്‌ ഹിറ്റ്‌ കോംമ്പോ
ഷുഗറുണ്ട്‌, പ്രഷറുണ്ട്‌ അതുകൊണ്ട്‌ മൈദയും പഞ്ചസാരയും വേണ്ട. ഇത്തരത്തിൽ ആവശ്യമായി എത്തുന്നവരേയും തൃപ്‌തിപ്പെടുത്താൻ ശർക്കരയിലും ഗോതമ്പിലും കേക്കുകൾ ഒരുക്കുകയാണ്‌ മുല്ലയ്ക്കലിലെ പ്രീമിയർ ബേക്കറി. എല്ലാ ദിവസവും വൻതോതിൽ വിറ്റഴിയുന്ന മെലൺ കേക്കാണ്‌ ഇവിടത്തെ കിടിലൻ ഐറ്റം. തണ്ണമത്തൻ രുചിയിൽ ഗോതമ്പിലും ശർക്കരയിലുമാണ്‌ ഈ കേക്ക്‌ തയ്യാറാക്കിയിരിക്കുന്നത്‌. മെലൺ കേക്കിന്‌ ആവശ്യക്കാരേറെയും 40 പ്ലസ്‌ ആണെന്ന്‌ ഉടമ ആർ ലതീഷും സമ്മതിക്കുന്നു. ഒരു വർഷം ഉണക്കിയ പഴങ്ങൾ പ്രിസർവ്‌ ചെയ്ത്‌ ഒരുക്കുന്ന മെച്ച്‌വേർഡ്‌ പ്ലം കേക്കാണ്‌ രുചികളിൽ മുൻപിൽ. എന്നാൽ ന്യൂജെനിന്‌ മില്ലറ്റിനേക്കാൾ പ്രിയം ഐസിങ്‌ കേക്കുകൾ തന്നെയാണ്‌. പുതുവത്സരത്തിനാണ്‌ ഐസിങ്‌ കേക്കുകൾ മുന്നിലെത്തുന്നത്‌. സ്‌കൂൾ, കോളേജ്‌ ക്രിസ്‌മസ്‌ സെലിബ്രഷേനുകളിൽ ഇന്നും താരം പ്ലം കേക്ക്‌ തന്നെ.
വിട്ടുതരില്ല റോയൽ ഐസിങ്ങ്‌
ജില്ല വിട്ട്‌ പോയി പണിയെടുക്കുന്ന ആലപ്പുഴക്കാർ ചിറപ്പിനോട്‌ അനുബന്ധിച്ച്‌ തേടിയെത്തുന്നത്‌ റോയൽ ഐസിങ്‌ കേക്കാണ്‌. വിളിച്ച്‌ മുൻകൂട്ടി ബുക്ക്‌ ചെയ്‌താണ്‌ റോയൽ ഐസിങ്‌ കേക്ക്‌ വാങ്ങാൻ എത്തുന്നത്‌. പഴമയുടെ രുചിക്കൂട്ട്‌ വിളിച്ചോതുന്ന റോയൽ അക്ഷരാർഥത്തിൽ ഇന്നും രാജാവായി തുടരുകയാണ്‌. അന്നന്ന്‌ ഉണ്ടാക്കുന്ന കേക്കുകൾ മണിക്കൂറുകൾക്കകം വിറ്റു തീരുകയാണ്‌. ഇതിനൊപ്പം കാരറ്റ്‌ കേക്ക്‌, ഡേറ്റ്‌സ്‌, ജാക്ക്‌ഫ്രൂട്ട്‌, മാർബിൾ, ഡേറ്റ്‌സ്‌ ആൻഡ്‌ നട്സ്‌ കേക്കുകളും ക്രിസ്‌മസിന്റെ വിപണി കാത്തിരിക്കുകയാണ്‌. മിഠായികളും പ്ലം കേക്കും ഡ്രൈ ഫ്രൂട്‌സും അടങ്ങിയ ഗിഫ്‌റ്റ്‌ ഹാമ്പറുകൾക്കും ആവശ്യക്കാരേറുന്നുണ്ട്‌.
0 comments